Lalaki nga giingong tig-ilis og asin sa shabu kon dunay magpapalit kaniya, wa na mahigmata gikan sa iyang kahinanok sa pagkatulog human pusila sa nag-inusarang wa mailhi nga gunman alas 3:45 sa hapon sa Huwebes, Pebrero 1, 2024 sa Sitio Punyang, Brgy. Duljo-Fatima, dakbayan sa Sugbo.
Si Gee Ronan Vernal Oralde, 29, ulitawo, naila sab nga Jordan, taga Sitio Puntod, Brgy. Mamabaling, namatay diha-diha tungod sa iyang usa ka samad sa tuo nga ilok.
Si Police Major Jonathan Taneo, hepe sa Mambaling Police Station nga nahinabi sa Superbalita Cebu sa Biyernes, Pebrero 2, nagkanayon nga ang biktima natulog sa lingkuranan nga kahoy kilid sa billiard table.
Niabot ang gunman nga nag-facemask ug nipusil kang Oralde makausa.
Sumala ni Taneo nga ang biktima naila sa ilang lugar nga hilabtanon, nagsulod gawas sa prisuhan tungod sa mga pagpangawat.
Mismo iyang inahan ug mga igsuon nangreklamo kay iyang gikawatan.
Matod ni Taneo nga nagbisyo sab kini sa ginadling drugas gawas sa pagkahilabtanon.
Nakadawat og report ang kapulisan nga kon dunay moeskor og drugas iyang tamblingan, ilisan sa biktima og asin ang “shabu” hinungdan nga nanaghan ang kaaway niini.
“Yes, Sir, naa siyay modus nga in ana ug murag aside ana, naa pa na siyay mga kaso pud, Sir. Mao nga naa siyay mga kontra o nakontra tungod ana,” dugang ni Taneo.
Narekuber nila sa crime scene ang usa ka kabhang sa kalibre .45 nga pistola.