‘Tigas’ sa Brgy. Tisa, nasikop

 SUSPEK: Ang suspek sa pagpabuto og armas sa Purok Sambag, Barangay Tisa, dakbayan sa Sugbo, nasikop sa kapulisan, alas 11:30 sa buntag, Dominggo, Marso 17, 2024. /
SUSPEK: Ang suspek sa pagpabuto og armas sa Purok Sambag, Barangay Tisa, dakbayan sa Sugbo, nasikop sa kapulisan, alas 11:30 sa buntag, Dominggo, Marso 17, 2024. / LABANGON POLICE STATION

Giilang tigas o gikahadlokan sa ilang lugar, ang nadakpan sa kapulisan human gialarma nga nagpabuto’g armas, alas 11:30 sa buntag, Dominggo, Marso 17, 2024, sa Purok Sambag, Barangay Tisa, dakbayan sa Sugbo.

Ang suspetsado giila nga si Jonas Sumampong Sistiso, hamtong ug nagpuyo sa naasoy nga lugar. Una siya’ng gireklamo sa mga molupyo nga manghulga kon hubog.

Matod ni Police Major Eraño Regidor, nakadawat silag tawag sa telepono nga dunay nagpasalba og armas busa dali sila nga niresponde uban sa mga sakop sa Special Weapons and Tactics (Swat) team.

Naabtan pa nila ang suspetsado sa dapit ug malampuson nga nasakmit sa kapulisan ang usa ka kalibre .38 nga revolver, usa ka bala ug basiyo nga gigamit sa pagpabuto.

Dugang ni Regidor, ang gipabuthan sa suspetsado mao ang iyang silingan nga barangay tanod.

Base sa record sa kapulisan, nadakpan na niadtong Mayo 10, 2021 ang suspek sa kasong carnapping ug siya usab ang gidudahan nga responsabli sa kawat sa maong barangay.

Kalapasan sa Republic Act 10591 kun Illegal Possession of Firearms, ang giandam nga kaso nga ipasaka sa kapulisan batok sa suspetsado. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph