‘Tighagbong’ og drugas gitipi

BIKTIMA: Ang biktima nga nagsakay og motorsiko nga gipusil-patay sa national highway sa Brgy. Antipolo, lungsod sa Medellin, ala 1:00 sa kaadlawon, Miyerkules, Abril 10, 2024. /
BIKTIMA: Ang biktima nga nagsakay og motorsiko nga gipusil-patay sa national highway sa Brgy. Antipolo, lungsod sa Medellin, ala 1:00 sa kaadlawon, Miyerkules, Abril 10, 2024. / Kapulisan sa Medellin

Tungod sa ‘onsehan’ sa gidiling drugas, usa ka lalaki gipusil-patay sa iyang kauban sa national highway sa Sitio Graje, Brgy. Antipolo, lungsod sa Medellin, ala 1:00 sa kaadlawon sa Miyerkules, Abril 10, 2024.

Sa imbestigasyon sa kapulisan sa Medellin ubos sa kamandoan ni P/Maj. Timothy Jim M. Romanillos, nailhan ang biktima nga si Reggie Taninas Palencia, 36, taga Brgy. Pooc, lungsod sa Sta, Fe sa isla sa Bantayan.

Nailhan siya sa kapulisan pinaagi sa iyang driver’s license ug national identification (ID) card.

Sumala sa kapulisan nga usa ka babaye nga lumolupyo sa dapit maoy nanawag ug nagpahibalo sa nahitabo nga pagpamusil. Ilang naabtan ang biktima nga nahagba sa da'n uban sa iyang motorsiklo.

Sa sinugdan wa pa siya mailhi kay way tawo sa dapit nga nakaila kaniya.

Gihulagway sa kapulisan nga ang biktima nagsul-ob og t-shirt nga kolor light gray, maong ang pantalon ug nag-helmet.

Gidala siya sa mga rescuer sa Medellin ngadto sa Cebu Provincial Hospital sa dakbayan sa Bogo apan gideklarar sa attending physician nga dead on arrival (DOA).

Matod ni Romanillos nga ilang nasubay ang background sa biktima nga naa sa watchlist sa ilegal drugas sa ubang unit sa kapulisan.

Dugang nasayran sa hepe nga tighagbong o tighatod og gidiling drugas ang biktima gamit ang motorsiklo.

Matod pa, usa sa iyang gihagbungan sa da­pit ‘gihulga sa biktima nga patyon’ human wa nakabayad sa gikuha nga ilegal nga drugas.

Apan, dason sa imbestigasyon, giunhan siya sa pagpusil sa dihang nilakaw na sakay sa iyang motorsiklo.

Mao kini ang gisunod nga anggulo sa kapulisan nga motibo sa pagpatay, lakip ang responsable niini nga giingong nisibat na human sa hitabo. / DVG, GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph