Tighimo og mga paltik nga armas didto sa Siyudad sa Danao ang gironda sa mga sakop sa Criminal Investigation and Detention Group (CIDG)-Cebu Provincial Field Unit pinasikad sa search warrant nga giisyu sa korte sa Biyernes sa kaadlawon, Abril 25, 2025, sa Sitio Lantawan, Barangay Cahumayan sa maong dakbayan.
Ang subject sa search warrant nga giluwatan ni Honorable Judge Ma. Josefa Pinza Ramos, ang executive judge sa Branch 90 sa Siyudad sa Danao, giila nga si Alejandro Castro Jr., 46, nagpailang mag-uuma nga nagpuyo sa nahisgutang lugar.
Nakuha sa mga sakop sa CIDG-Cebu Provincial Field Unit sa pagpangulo ni Police Lieutenant Colonel Randy Korret ang upat ka kalibre 45 nga pistola ug magazine niini ug usa ka 38 nga revolver ug mga bala niini.
Ang pangalan ni Castro mitumaw human gihinganlan ang Barangay Cahumayan sa mga nanglabay nga mga dinakpan sa CIDG diin sila mipalit og armas.
Dali nga mihimo og surveillance operation ang CIDG-Cebu Provincial Field Unit sa maong barangay aron makisayod kinsa ang tighimo sa mga paltik nga armas sa lugar ug migawas ang pangalan ni Castro.
Tungod niini, ni-apply og search warrant sa korte ang kapulisan nga giaprobahan usab dayon ug ila gilayon kini nga gipatuman.
Mibutyag ang CIDG-7 nga ila’ng gihingusgan karon ang pagsakmit sa mga loose firearms sa Central Visayas taliwala ning nagkaduol nga eleksyon sa Mayo 12, 2025.
Ang pagsakmit sa mga loose firearms kabahin sa flagship program sa CIDG nga mao ang “Oplan Paglalansag Omega.”
Kasamtangan nga gikustodiya sa CIDG 7 custodial facility si Castro, kinsa mag-atubang og kasong kalapasan sa Republic Act 10591 o Comprehensive Firearms and Ammunition Regulation Act. / AYB