Nagtingkagol sa Waterfront Police Station ang 23-anyos nga tindera sa usa department store nga nahimutang sa Barangay Sto. Niño, Dakbayan sa Sugbo sa alas 8:30 sa gabii, Lunes, Agusto 4, 2025.
Giila ang dinakpan nga si alyas Sharly, residente sa Inayagan, Naga City.
Nasayran nga si Sharly gidakop pinaagi sa citizen’s arrest dihang nasakpan nga gikuha ang duha ka paresan sa sapatos nga nagkantidad og P999 matag usa ug tabon sa kaldero nga bildo nga tag P269.
Aron unta nga dili mamatikdan, si Sharly nigamit og resibo nga wala matukma sa iyang gipangkuha.
Si Police Staff Sgt. Epifanio Comedido, Jr., imbestigador sa Waterfront Police Station nibutyag sa Superbalita Cebu nga, “Pagtan-aw sa house detective lahi man ang resibo nakabutang kay August 1, 2025, unya Agusto 4, 2025, naman ron ang petsa.”
Ang maong mga item gisulod og plastic bag nga adunay logo sa mall.
Tungod sa iyang nabuhat, gidakop kining suspek og mag-atubang og kasong qualified theft. / JDG / GPL