Tinun-an sa grade 10 didto sa lungsod Calape, Probinsya sa Bohol ang napusasan sa gilusad nga buy-bust sa mga sakop sa Inabanga Municipal Police Station alas 11:50 sa gabii, Huwebes, Hulyo 17, 2025 sa Barangay Tungod sa Lungsod sa Inabanga.
Ang nasikop giila nga si Joshua Cabido, 22, gitumbok nga usa ka high value individual nga taga Purok 1, Barangay Mantatao, Calape.
Nasakmit sa mga sakop sa Station Drug Enforcement Unit sa Inabanga Police Station uban sa Drug Enforcement Unit sa Provincial Intelligence Unit sa Bohol Police Provincial Office ang mga dagkong putos sa gituohang shabu nga motimbang sa usa ka kilo nga dunay standard drug price nga P6,800,000.
Usa sa mga personnel sa Inabanga Police Station mibutyag nga nakadawat sila og impormasyon nga naabot sa ilang lungsod ang suspek aron sa pagpamaligya sa ilegal nga drugas.
Mihimo dayon sila og monitoring og background investigation ug migawas ang pangalan ni Cabido.
Gipaubos dayon nila sa duha ka semana nga surveillance si Cabido ug sa dihang nakumpirmar ang iyang ilegal nga kalihukan gipahigayon dayon ang buy-bust nga miresulta sa iyang pagkasikop.
Base sa nakuha nga kasayuran, makahurot og baligya ang suspek og 1 kilo nga shabu matag semana gikan sa iyang tinubdan nga si alyas Tsoy-Tsoy.
Mitug-an si Cabido sa mga imbestigador nga gikan sa Dakbayan sa Sugbo ang nakuha nila nga ilegal nga drugas.
Mihatag kini og mga pangalan sa mga drug personalities nga mao karon ang target sa follow up operation sa kapulisan.
Giandam na ang kasong kalapasan sa Section 5 ug 11, Section II, Republic Act 9165 kun Comprehensive Dangerous Drugs Act of 2002 nga ipasaka batok sa suspek. / AYB