Namatay ang usa ka 21-anyos nga lalaking tinun-an sa college ug choir member sa aksidente sa motorsiklo alas 11:20 sa gabii sa Huwebes Santo, Marso 28, 2024 sa Sityo Managing, Brgy. Nug-as, lungsod sa Alcoy, habagatang Sugbo,
Ang biktima namatay sa kaadlawon sa Biyernes Santo Marso 29, 2024.
Ang biktima giila nga si Eduardo Jadraque Capote, 21, ulitawo, tinun-an sa Center for Industrial Technology and Enterprise (Cite) sa Brgy. San Jose, Dakbayan sa Sugbo. Si Capote taga Sityo Cansili, Brgy. Nug-as.
Usa ka tuig siya nga sakop sa King’s Men Chorale sa Cite, base sa Facebook post sa grupo.
Sa imbestigasyon sa kapulisan sa Alcoy ubos sa kamanduan sa ilang hepe nga si P/Captain Jerry De Castro Magsayo, nahibaw-an sa Superbalita Cebu nga ang biktima nagmotorsiklo padulong sa Brgy. Poblacion.
Apan sa dihang nagpadulhog na sa karsada sa Managing, wa na siya makamaniubra sa iyang gimaniho nga motorsiklo, kini nabangga sa usa ka poste sa koral.
Ang biktima gidali sa pagdala sa mga sakop sa Alcoy Municipal Disaster Risk Reduction and Management Office medical personnel sa Bogo Argao District Hospital sa lungsod sa Argao, apan gumikan sa grabing naangkong kadaut sa kalawasan, labina sa ulo, ang biktima namatay mga alas 4 sa kaadlawon sa Marso 29, 2024. / DVG