DUHA ka menor de edad ang malampuson nga na-rescue sa mga sakop sa Mambaling Police Station human ma buy-bust alas 12:45 sa kaadlawon, Huwebes, Hulyo 3, 2025, atol sa gilusad nga Oplan Bulabog sa kapulisan sa Sitio Puntod, Barangay Mambaling, Siyudad sa Sugbo.
Ang mga na-rescue nagpangidaron og 17 nga tinun-an sa Alternative Learning System (ALS) sa DepEd, residente sa Sitio Buwaran, Barangay Sawang Calero ug ang 16-anyos nga tinun-an sa Grade 7 nga taga Sitio Naba, Barangay Mambaling.
Nakuha gikan kanila ang mga pinutos sa gituohang shabu nga motimbang ang tanan og 21 gramos nga dunay standard drug price nga P142,800.
Ang duha ka menor de edad nga na-rescue giatiman na sa Women’s and Children Protection Desk sa Mambaling Police Station alang sa himuon nga intervention.
Bisan pa man sa ilang pangidaron, ang kapulisan mopasaka gihapon og kaso sa maong mga menor de edad.
Sa laing bahin, taxi driver napusasan human nakuhaa'g shabu sa Miyerkules, Hulyo 2, 2025, sa Ybañez Compound, Barangay Mambaling.
Ang nadakpan mao si Ricky Rabas Ledesma, 47, ulitawo, lumad nga taga Bacolod City, kasamtangang nagpuyo sa Sitio Duko, Barangay Duljo Fatima, Dakbayan sa Sugbo.
Nakuha sa kapulisan sa possession sa taxi driver ang 0.80 gramos nga shabu mobalor sa P5440.00. / AYB / GPL