Sa dili pa magsugod ang klase, ang Kagamhanan sa Dakbayan sa Lapu-Lapu manghatag og libreng school supplies sa tanang tinun-an sa publikong tunghaan.
Si outgoing Mayor ug Congressman-elect Junard “Ahong” Chan nisulti sa SunStar Cebu nga ang siyudad nigahin og P26 milyunes alang niini.
Tumong niini, mao ang pagpagaan sa pinansyal nga palas-unon sa mga ginikanan sa pagsugod sa school year 2025-2026.
“Ang mga notebook, ballpen, ug uban pang importanteng gamit ihatag sa mga kindergarten, elementarya, high school, ug senior high school nga mga tinun-an nga walay bayad,” matod ni Chan.
Dugang ni Chan nga ang programa unang gipatuman sa Olango Island.
Ang klase sa mga pampublikong eskwelahan ubos sa Department of Education (DepEd) gikatakdang magsugod sa Lunes, Hunyo 16.
Matod ni Chan, ang pagpanghatag sa supplies alang sa kindergarten ug elementarya nga mga tinun-an pagahimuon sunod semana samtang ang mga tinun-an sa high school ug senior high school makadawat sa ilang supplies sa Hulyo.
Mao kini ang mga eskedyul sa pagpanghatag, kindergarten: Hunyo 23 hangtod 27, elementarya: Hulyo 7 hangtod 11 , high school, ug senior high school: Hulyo 14 hangtod 18.
Gipasabot ni Chan nga kini iyang gihimo tungod sa iyang obserbasyon nga duha ka bulan human magsugod ang klase, manghatag ang DepEd og libreng school supplies, unya nakapalit na ang mga ginikanan para sa ilang mga anak.
Ang kagamhanan nagtinguha nga mahatag ang mga supplies og mas sayo aron masiguro nga makaabot kini sa mga estudyante sa dili pa mopalit ang mga ginikanan sa gikinahanglang butang.
Matod ni Chan nga ang matang ug gidaghanon sa school items magdepende sa ang-ang sa pagtungha sa mga estudyante.
Samtang si Mayor-elect Cynthia King-Chan nipasalig usab nga prayoridad ang edukasyon sa iyang administrasyon.
Nagplano siya nga molusad og susamang programa alang sa libreng pagpanghatag og kompletong school uniforms, sama sa gihimo sa ubang highly-urbanized cities. / DPC