Nag-una sa Top 10 sa Medical Technologists Licensure Examination ang tinun-an sa Velez College nga si Jherry Andrei Dellica Arbotante, kinsa nakakuha og 92.30 percent nga rating.
Ang resulta sa maong pasulit gipagawas sa Professional Regulation Commission (PRC) niadtong Huwebes, Abril 3, 2025.
Laing duha ka estudyante gikan sa Visayas ang nalakip sa Top 10 nga gilangkuban nila ni Ian Jay Balag Francisco ug Kyle Angelo Gonzalez Tapia, pulos ni-graduwar sa Silliman University sa Dumaguete City, Negros Oriental.
Si Francisco nalandig sa ika-unom nga puwesto nga adunay rating nga 91.19 percent, samtang si Tapia sa ikawalong puwesto nga adunay rating nga 90.90 percent.
Ang nahabiling mga Top 10 passers naggikan sa Luzon ug sa Mindanao.
Samtang ang Cebu Doctors' University maoy ikatulo sa listahan sa mga top performing schools nga adunay 98.74 percent passing rate.
Nagsunod ang Velez College nga adunay 98.38 porsyento nga passing rate.
Ang PRC mipahibawo nga sa 7,659 ka examinees, 6,147 o 80.26 porsiyento niini ang nakapasar sa board exam.
Ang Medical Technologists board exam gipahigayon niadtong Marso 26-27 sa mga testing centers sa National Capital Region (NCR) ug mga dakbayan sa Baguio, Cagayan de Oro, Cebu, Davao, Iloilo, Koronadal, Legazpi, Lucena, Pagadian, Pampanga, Rosales, Tacloban, Tuguegarao, ug Zamboanga. / CLC