Nangaukab ang portion sa Metro Cebu Expressway ug ang riprap sa daplin niini sa Sitio River Side, Barangay Cantao-an, dakbayan sa Naga, nangahunlak sab.
Migrabe ang pagpangliki sa pangpang ug paghunlak sa yuta sa naasoy nga dapit dihang giduaw sa Superbalita Cebu uban sa mga opisyal sa siyudad niadtong Okubre 26, 2023.
Mao kini ang namatikdan sa hepe sa kapulisan sa Naga nga si Police Lt. Col. William Homoc ug Engr. James Generale sa City Environment and Natural Resources Office (Centro) sa Naga atol sa pagbisita human usab kini nila nasusi sayo ning Oktubre.
Niadtong unang semana ning buwana, dili mominos 35 ka mga pamilya o 128 ka mga indibidwal nga mga lumolupyo gipabakwit na ngadto sa Cantao-an Elementary School tungod sa namatikdan nga pagpangliki sa yuta.
Kini human nirekomendar ang Mines and Geosciences Bureau (MGB 7) sa pagpabalhin sa mga lumolupyo tungod sa risgo sa landslide sa dapit.
Dugang nasayran sa Superbalita Cebu nga ang MGB 7 nagpadayon sa ilang pagsusi sa dapit.
Pipila ka mga molupyo nga nahinabi ning mantalaan niingon nga namakwit sila apan mouli sa adlaw aron pag-atiman sa ilang hayupan ug mga tanom.
Apan dili sila magdugay sa pagpundo sa dapit labi na kon gabii ug mag-uwan tungod sa ilang masinati nga pagdahunog ug pag-uyog sa yuta.
Nabantayan sa mga lumolupyo nga nagsugod ang suliran dihang gitrabaho og sugod ang expressway ug sa padayon nga pagsige og ulan sa nanglabay nga mga buwan.
Samtang, matod ni Homoc nga gikahinabi sa Superbalita Cebu, nga ang karsada maagian pa hinuon kay portion ra sa dalan ang nadaut.
Apan niawhag siya sa mga moagi sa dapit nga mag-amping labina kon ting-uwan tungod sa padayong pagrabe sa liki sa yuta sa bukid.
Matod ni Homoc nga daghan nang moagi nga sakyanan sa bag-ong expressway tungod sa kalapad sa dan ug molikay sa trapik sa karaang highway. Ang expressway molusot ngadto sa Siyudad sa Danao.
Gisugdan kini pagtrabaho sa Dept. of Public Works and Highways (DPWH) sa administrasyon ni kanhi Presidente Rodrigo Duterte.
Wa pa niluwat og pamahayag ang DPWH kalabot sa hitabo.
Ang expressway nga molagbas sa kabukiran sa Metro Cebu gipaabot nga mosulbad sa grabeng kahimtang sa trapiko kay duna may alternatibong maagian ang mga motorista. Gibana-bana nga mogasto kini og labing minos P95 bilyunes.