Sirhan sa hingpit gikan sa trapiko ang usa ka portion sa Osmeña Boulevard sa hinapos ning semanaha kon hingpit nang gub-on ang skywalk nga nahimutang sa tungod sa Cebu Normal University (CNU).
Matod ni Cebu City Transportation Office (CCTO) chief Raquel Arce nga sa dili madugay ipatuman ang pagsira sa mao nga karsada gikan sa Dan P. del Rosario paingon sa eskina sa Dan RR Landon, sa higayon nga masugdan na ang pagtangtang sa skywalk duol sa CNU.
Magpabiling epektibo ang pagsira sa panahon sa inisyal nga hugna sa pagtrabaho sa slab sa lugar, nga sugod sa Biyernes sa gabii, Pebrero 23, 2024.
Si Arce niingon nga ang road closure activities mahitabo sa gabii atol sa pagtangtang sa skywalk materials.
Siya nidugang nga ang hingpit nga pagsira sa apektadong bahin ipatuman sa higayon nga magsugod na ang slab work aron masiguro ang kaluwasan sa mga trabahante ug publiko.
Matod ni Arce nga dili sila mopatuman og hingpit nga pagsira samtang gitangtang pa sa kontraktor ang atop sa skywalk.
Ang pagtangtang sa skywalk duol sa CNU gilauman nga mahuman sa Dominggo, Pebrero 25, 2024.
Ipabutang ang road advisories aron mapahibalo ang mga motorista sa pagsira ug paggiya kanila sa alternatibong mga rota.
Si Arce niingon nga sa miagi wala sila nakabutang og advisories tungod sa kalit nga pagpatuman sa pagpasira sa dalan.
Hinuon, matod ni Arce, bahin sa pagtangtang sa skywalk duol sa CNU, ang traffic advisories ibutang sa unahan alang sa katuyoan sa kaluwasan aron malikayan ang bisan unsang aksidente o pagkabalda tungod sa nagpadayon nga construction work.
PERSONNEL
Isip pagtubag sa pagkatangtang na sa skywalk duol sa Fuente Osmeña sa Osmeña Boulevard, dugang traffic personnel ang gipakatap sa dapit aron pagseguro sa kaluwasan ug kahapsay sa dagan sa pedestrian ug trapiko.
Samtang, si Cebu City Mayor Michael Rama natagbaw sa pagtangtang sa skywalk bisan kon nalangan ang pagpatuman.
“Better late than never,” matod ni Rama.