Wala wad-a ang posibilidad nga adunay bahin alang sa Central Visayas ang bag-o lang nasakmit nga ilegal nga drugas nga mobalor og P13.3 bilyunes sa Alitagtag, Batangas tungod sa gidaghanon niini.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office 7, nga wala pa sila makakuha og kasayuran nga tipik niini alang sa Sugbo.
Apan masayran kini pinaagi sa custodial debriefing sa mga polis sa kaulohan.
Apan gibutyag ni Pelare nga sa kadaghan sa nakuha sa kapulisan, dako kini og epekto sa supply sa tibuok Pilipinas.
Kon wala kini masakmit sa kapulisan, nakaseguro si Pelare nga dakong kadaut sa kaugmaon sa mga batan-on ang mahatag niini.
Gidugang niya nga tungod kay ang Sugbo mao ang transhipment point sa supply sa ilegal nga drugas, duna silay madakpan ug makuha nga ubay-ubay nga volume.
Apan iyang gipasabot nga dili kini alang lang sa lalawigan sa Sugbo sanglit ang uban niini alang sa mga silingang rehiyon sama sa Mindanao ug ubang probinsya sa Central Visayas. / AYB