
Parehong ningpadayag sa ilang kaandam ang Brgy. Ginebra Gin Kings ug TNT Tropang Giga kabahin sa ilang panagtagbo sa championship series sa Philippine Basketball Association (PBA) Season 49 Commissioner’s Cup nga sugdan karong Biyernes, Marso 14, 2025, sa Mall of Asua Arena.
Mas nagmasaligon ang Gin Kings gumikan kay nahimsog na pagbalik ang duha sa ilang mga pambato nga sila si Jamie Malonzo ug Jeremiah Gray.
Gawas niini, gituohan nga makondisyon na sab og insakto si Troy Rosario, kinsa nakasinati og angol ning bag-uhay lang.
Ning maong mga kalambuan, kompleto sa mga hinagiban ang Gin Kings.
“I think we’re coming into this series with a lot more depth than we had in the last time we played them and I think that’s going to be a big factor for us,” matod ni Malonzo nga napatik sa www.pba.ph.
Sa ilang bahin, ang Tropang Giga nawad-an og usa ka lig-ong hinagiban human nakasinati og angol sa tuhod si Jayson Castro, kinsa dili na makabalik pagduwa hangtod mahuman ang season.
Taliwala niini, malaumon ang Tropang Giga nga matapakan ra nila ang dakong haw-ang nga nabiyaan ni Castro ug makasugakod ra sila sa puwersa sa Gin Kings.
“Our ability to play at a high level without Jayson will be key,” matod ni TNT coach Chot Reyes.
“Having said that, these other players that we have are not going to sell them short because they’ve really shown in the last series how well they can play even without Jayson.”
Gipasabot ni Reyes nga wala’y bisan kinsa sa ilang mga magduduwa ang makatapak sa haw-ang nga nabiyaan ni Castro apan pinaagi sa panaghiusa sa tanan nilang mga magduduwa, kaya kini nilang buhaton.
Sa laing bahin, nagtuo si PBA chairman Ricky Vargas nga mao kini ang labing makapaukyab ug kulbahinam nga finals nga mahitabo sa PBA.
“This may be the best finals that will ever happen in the PBA,” batbat ni Vargas. / ESL