Daw og nasuhong ang nag-ung-ong na unta nga grandslam sa TNT Katripang 5G human, sa makausa pa, niyukbo na usab kini sa San Miguel Beer sa bag-o lang natapos nga PBA Philippine Cup best-of-seven finals.
Dili ni maoy unang higayon nga napakgang ang TNT sa ilang damgo nga maka-grandslam apan di usab kini unang higayon nga ang San Miguel maoy nakasugpo kanila.
Niadtong 2011, ang TNT nakahagdaw na og titulo sa unang duha ka conferences apan napildi kini sa 3rd conference sa San Miguel Beer nga niadtong panahona nagdala sa ngalan nga Petron Blazers ubos sa paggiya ni coach Ato Agustin.
Sa ato pa “so near, and yet so far.”
Pero wa kini magpasabot nga nahanaw na ang ilang paglaom nga maka-grandslam.
Siguro di pa karon. Dako pa ang kahigayonan, ug kinsay nasayod nga sa sunod di na San Miguel ang makontra nila sa finals kay mura man og sila niini mahawngan. Ang titulo maoy ikanapulo na ni coach Leo Austria isip head coach sa PBA.
Sagad niini ubos sa San Miguel Beer. Siya ang ikaduhang coach sa San Miguel Beer nga adunay pinakadaghan og kampiyonato, sunod ni coach Norman Black.
Congratulations, San Miguel Beer!
○ ○ ○
Layo man tuod sa tinuod, apan kay lagi naghatag man og human interest, di gyud nato malikayan nga daghan ang mosakay sa isyu.
Ang buot nakong ipasabot mao kining boxing match ni General Nicolas Torre ug ni Davao City Vice Mayor Baste Duterte nga unang gikataho sa mainstream media apan grabeng mikatap ug gisawsawan sa social media nga gani gihimo na hinuong kataw-anan.
Pipila ka mga politiko, ilabi na kadtong uhaw sa publisidad, ang mipahumulos sab dayon ug daling miintra alang sa ilang kaugalingong interest.
Apan ang wala nila malantaw mao nga ang ilang gihimo nakapaubos sa moral sa Filipino ug sa intigridad sa nasod.
Pastilan, sa kadaghan sa problema nga atong giatubang nga nagkinahanglan unta sa ilang pagtagad kini pa gyung way hinungdan ang ilang giasikaso. Purya gaba.