Niamag og samot ang paglaum sa TNT Tropang Giga alang sa inilugay og luna sa Top 2 human nila gipangkusokuso ang defending champions San Miguel Beermen, 115-97, sa main game niadtong Dominggo sa gabii, Enero 26, 2025, sa Philippine Basketball Association (PBA) Season 49 Commissioner’s Cup sa Ynares Center sa Antipolo City.
Ang Tropang Giga kasamtangang nagsolo sa ikaduhang luna dala ang 8-3 nga rekord sunod sa league-leader NorthPort Batang Pier, nga ninghuman sa ilang mga tahas sa elimination round bawon ang 9-3 nga baraha.
Ning puntoha, ang Tropang Giga hasta ang Batang Pier dili pa makaseguro sa Top 2 gumikan kay posible pa nga mahitabo ang triple-tie sa 9-3 nga rekord sa ibabaw nga bahin diin ikauban nila ang Meralco Bolts, nga adunay 7-3 nga baraha.
Kon mahitabo kini, gamiton ang FIBA quotient tie-breaker aron pagdeterminar sa Top 2.
Sa ilang bahin, ang Beermen nabutang sa delikadong sitwasyon human sila nahagsa sa ika-10 nga dapit dala ang 5-7 nga baraha.
Ning puntoha, aduna pa’y purohan nga makailog ang Beermen sa ikawalo ug katapusang puwesto sa quater-finals apan kuli na kining mahitabo.
Ang Beermen, nga nakahuman na sa ilang misyon sa eliminasyon, igo na lang mag-ampo nga mopabor kanila ang resulta sa nahabiling mga duwa.
Sa laing duwa, gipanglampornas sab sa Magnolia Chicken Timplados Hotshots ang guest team Hong Kong Eastern, 107-78.
Niini, ang Hotshots nakigbahin sa NLEX Road Warriors sa kasamtangang ikawalo nga puwesto bitbit ang 5-6 nga rekord.
Sa ilang bahin, ang Hong Kong naa sa ikaunom nga puwesto dala ang 7-4 nga rekord.
Puntos kada usa:
1st game:
Magnolia (107) - Ratliffe 25, Lastimosa 20, Lucero 20, Sangalang 14, Barroca 11, Dela Rosa 8, Abueva 5, Alfaro 4.
Hong Kong (78) - McLaughlin 20, Yang 14, Lam 13, Cao 9, Blankley 9, Guinchard 4, Cheung 3, Pok 3, Chan 2, Zhu 1.
2nd game:
TNT (115) - Hollis-Jefferson 35, Pogoy 22, Oftana 16, Castro 14, Erram 14, Nambatac 6, Williams 6, Galinato 2.
San Miguel (97) - Fajardo 34, Trollano 13, Pope 10, Tautuaa 10, Lassiter 9, Perez 9, Cruz 6, Ross 3, Tiongson 3. / ESL