Nagpaulan og tres ang TNT Tropang Giga 5G aron putlan og kuryente ang Meralco Bolts sa Philippine Basketball Association (PBA) Philippine Cup Domingo sa gabii, Mayo 11, 2025, Ninoy Aquino Stadium.
Pinaagi sa laing hayag nga shooting display, napadayon sa TNT Tropang 5G ang ilang winning streak ug nakaabot na sa .500 nga marka human sa ilang 101-84 nga kadaugan batok sa Meralco Bolts sa PBA Philippine Cup nga gipahigayon sa niadtong Domingo sa gabii.
Ang Tropang 5G nakapasulod og 16 sa 32 ka attempts sa tres, ug usa ka four-point shot, samtang ang Meralco igo ra nakabuhat og tulo sa tres.
Nanguna sa opensa sa TNT sila si RR Pogoy ug Calvin Oftana nga nagpasulod og lima ka three-point shots matag-usa. Gisundan sila nila Glenn Khobuntin ug Kelly Williams nga nakadugang og duha matag-usa, ug Simon Enciso ug Rey Nambatac nga nakapasulod pud og usa ka tres.
Tungod niini ang TNT nisaka sa 3-3 (win-loss) record ug hingpit nga naka-recover sa maot nga 0-3 nga pagsugod sa conference.
Sila Pogoy, Oftana ug Nambatac nakatampo og importante nga puntos sa finishing run sa TNT nga maoy nipalupad sa TNT gikan sa 77-all nga iskor.
Si Pogoy nimugna og 34 puntos, si Oftana nitunol og 28 puntos, samtang si Nambatac ug Poy Erram nidugang og 13 ug 10 puntos alang sa Tropang Giga.
Si Cliff Hodge nakapuntos og 23 para sa Bolts, samtang sila Chris Newsome (18), Aaron Black (15), Raymond Almazan (12), ug Bong Quinto (11) nitabang pud sa scoring sa pilderong Bolts.
Puntos Matag-usa
TNT (101) - Pogoy 34, Oftana 28, Nambatac 13, Erram 10, Khobuntin 6, Williams 6, Enciso 4, Heruela 0, Varilla 0, Aurin 0.
Meralco (84) - Hodge 23, Newsome 18, Black 15, Almazan 12, Quinto 11, Banchero 3, Cansino 2, Bates 0, Jose 0, Maguliano 0, Rios 0. / RSC