Magbinuakay og tabla ang San Miguel Beermen ug Grandslam-seeking TNT Tropang 5G sa ilang panagsangka og balik karong Biyernes sa gabii, Hulyo 18, 2025, alang sa Game 3 sa Philippine Basketball Association (PBA) Season 49 Philippine Cup finals series sa Smart Araneta Coliseum.
Ang Beermen ninglubong sa ilang kaligutgot human sa ilang kontrobersyal nga kapildihan sa Game 1 ug gibawsan nila ang Tropang 5G sa Game 2, 98-92, niadtong Miyerkules sa gabii, Hulyo 16, aron tablahon ang best-of-seven series, 1-1.
“Talagang hindi kami pinatulog nung Sunday (Game 1). Pero wala naman kaming magagawa but to bounce back in Game 2. Makikita naman sa body language ng players na they wanted to win,” matod ni San Miguel coach Leo Austria nga napatik sa www.pba.ph.
Ang kapildihan sa Beermen sa Game 1, 96-99, nahimong kontrobersyal tungod kay gikaltasan og duha ka mga puntos ang Beermen sa himatyong mga segundos human sa desisyon sa mga opisyal nga nakahimo si bigman Mo Tautuaa og offensive basketball interference atol sa iyang paghansak.
Human sa ilang kadaugan sa Game 2, gilaumang nahupay na ang pagbati sa Beermen ug makatutok na sila og insakto alang sa ilang misyon nga pagkgangon ang Tropang 5G sa Grandslam nga ambisyon niini.
Sa ilang bahin, ang Tropang 5G kinahanglang makahimo og dakong adjustments aron masugakod ang mga kakulian nga ilang giatubang partikyular ang pagkaangol sa ilang pambatong mga magduduwa.
Game 2 boxscores:
San Miguel (98) - Trollano 22, Fajardo 17, Tautuaa 16, Teng 10, Perez 8, Ross 7, Cruz 6, Brondial 6, Tiongson 4, Lassiter 2.
TNT (92) - Oftana 23, Heading 15, Williams 11, Ganuelas-Rosser 10, Enciso 7, Erram 6, Pogoy 6, Khobuntin 6, Aurin 4, Heruela 4. Quarters: 23-19, 51-39, 75-74, 98-92. / ESL