Aron masulbad ang kahuot sa trapiko sa dakbayan sa Toledo, usa ka bag-ong terminal ang tukuron sa Kagamhanan sa Siyudad sa Barangay Sangi.
Kini maoy gipahibawo sa Siyudad atol sa ground breaking ceremony pinangulohan nila ni Mayor Marjorie Perales, Vice Mayor Jay Sigue nga gitambungan usab nila ni Cebu Governor Gwen Garcia ug Cebu third district Congressman Pablo John Garcia.
Ang groundbreaking sa Toledo City Land Transportation Terminal gipahigayon niadtong Biyernes, Pebrero 16, 2024.
Ang kagamhanan naggahin og P126.04 milyunes alang sa giplanong terminal nga ibutang sa duha ka hektaryang luna atbang usab sa proposed campus sa Cebu Technical University (CTU) Toledo City Campus.
Gawas sa modernong disenyo niini, aduna usay mga paabangan nga lawak sa sulod alang sa mga baligya, office spaces, ticketing areas, waiting areas ug uban pa.
Gibana-bana nga mahuman ang maong proyekto sulod sa 450 calendar days.
Sa nasayran, nahimutang ang karaang terminal sa Barangay Poblacion nga giingong karaan na.
Subay sa pagsusi, gikinahanglan na usab kining usbon ug ibalhin sa mas hamugaway nga lugar aron dili makabalda sa sitwasyon sa trapiko sa lugar.