Tolentino hayag na alang sa BPC award

Gihatagan og gibug-aton ni Arvin Tolentino ang suporta sa iyang mga kauban sa NorthPort Batang Pier isip maoy dakong hinungdan nga nahimo siyang lig-ong kandidato alang sa inilugay sa Best Player of the Conference award sa Philippine Basketball Association (PBA) Season 49 Commissioner’s Cup.

Gipasabot ni Tolentino nga ang iyang kalampusan, kalampusan sab sa tibuok nilang puwersa ug dili kini mahimong posible kon wala ang panagtambayayong sa usa’g usa.

Sa pagsulod sa semi-finals, diin ang Batang Pier maoy No. 1 seed, si Tolentino nakarehistro og 39.9 statistical points, ikaduha sunod sa Sugboanong higante sa San Miguel Beermen nga si 8-time MVP June Mar Fajardo, kinsa nitali og 42.0 SPs.

Apan gumikan kay wala man nakasulod sa playoffs ang Beermen, hayan niburot ang purohan ni Tolentino nga mailog gikan sa produkto sa University of Cebu (UC) Webmasters ang BPC title.

“Magandang recognition yun for me, pero deserved din ng teammates ko yun,” matod ni Tolentino nga napatik sa Spin.ph.

“If I can share it with them pieces of that award if ever I win it.”

Si Fajardo, kinsa nagtinguha unta sa iyang ika-12 nga BPC award, nataktak na sa listahan sa mga kandidato sa BPC award tungod sa pagkataktak sa Beermen sa elimination round.

Mao sab kini ang kaso sa usa sa mga pambato sa NLEX Road Warriors nga si Robert Bolick, kinsa naa unta sa ikatulo dala ang 37.1 SPs.

Ang makonsiderar na lang nga lig-on nga karibal ni Tolentino sa inilugay sa BPC award mao si TNT Tropang Giga forward Calvin Oftana, kinsa naa sa ikaupat nga adunay 32.7 SPs.

Ang Tropang Giga usa sa mga nakasulod sa semi-finals.

Kon dili molubad ang duwa ni Tolentino, hayan kuli na siyang maapsan sa inilugay sa BPC award. / ESL