Tomboy naangol human siya gipusil sa lalaki nga giingong iyang karibal sa gugma sa usa ka babaye samtang lalaki nga menor de edad nga nitabang napagan atol sa insidente sa Lunes sa alas 10 sa gabii, Pebrero 19, 2024 sa Barangay Poblacion-Pardo, Cebu City.
Ang biktima giila nga si Crissandra Jane Fernandez, 20, sakop sa Lesbian, Gay, Bisexual, Transgender, Queer (LGBT), nagpuyo sa nahisgutang lugar.
Ang biktima nakaangkon og samad pinusilan sa lawas samtang ang iyang tuong tiil nabali gumikan sa igo sa bala.
Napagan sa pagpamusil si Joshua Padayos, 16, nagpuyo sa nahisgutang lugar nga adunay samad pinusilan sa tiil.
Atol niining pagsuwat, wa pa madakpi ang suspek nga si Marvin Tura Cordova, hingkod, residente sa naasoy’ng lugar, ug ang iyang kauban nga maoy nagmaneho sa motorsiklo nga dali nga nakasibat.
Si Police Staff Sgt. Alfredo Macabodbod, imbestigador sa Inayawan Police Station nga nahinabi sa Superbalita Cebu, nitug-an nga “love triangle” ang motibo sa kremin.
Kini human nagselos ang suspek kay ang iyang 20 anyos nga uyab gikarelasyon sab sa biktima.
Sumala ni Macabodbod nga sigun sa gibutyag sa biktima nga gibaharan na siya sa suspek.
DUMMY ACCOUNT
Ang suspek giingon nga nigamit og fake account sa Facebook nga nagpaka aron ingnon nga mao ang babaye nga ilang giilugan.
Nagtuo si Fernandez nga ang maong FB account iya sa babayeng iyang gika-interesan.
Sa ilang komunikasyon, buot niining makigkita kaniya hinungdan nga nituman sa sabot ang biktima ug nigawas sa ilang panimalay dayon nisakay sa traysikad.
Apan diha na si Cordova nagpaabot sa eskina, dayon nipusil kang Fernandez nga diha na naglingkod sud sa traysikad nga puwerting lihaylihay aron di maigo.
Makita sa CCTV footage nga gi-share sa Superbalita Cebu nga adunay nagpaabot nga motorsiklo sa suspek.
Dihang naigo ang biktima, dayon nahagba, gitabang kini sa usa ka lalaki nga menor de edad.
Ang mga suspek nibalik sa agi ug gitiwasan sa pagpusil ang biktima, apan ang menor de edad maoy naigo.
“Kaila man ang biktima ani suspek kay gipersonal siya og bahad ani. So, love triangle ang motibo,” dugang ni Macabodbod.
Hayan wa kadawat ang suspek sa nahitabo sa iyang hinigugma hinungdan sa suway nga pagpatay, dugang sa polis.