Mga duwa karon:
5:00 pm- Phoenix batok Blackwater
7:30 pm- Magnolia batok TNT
Mosuway pag-angkon og puwesto sa Top 4 ang Magnolia Chicken Timplados Hotshots sa ilang pagpakigsangka sa TNT Tropang 5G sa main game karong Biyernes sa gabii, Hunyo 13, 2025, sa Philippine Basketball Association (PBA) Season 49 Philippine Cup sa Ninoy Aquino Stadium sa Manila.
Ang Hotshots, nga adunay 7-3 nga rekord ug mosagubang sa katapusang tahas nila sa elimination round, kasamtangang natanggong sa three-way tie sa ikaduhang dapit kauban ang ilang igsuong mga puwersa nga mao ang San Miguel Beermen ug Brgy. Ginebra Gin Kings.
Kon modaog ang Hotshots, hayan maklaro na og gamay ang senaryo kabahin sa inilugay og mga puwesto sa Top 4, nga maghatag og twice-to-beat nga benepisyo sa quarter-finals.
Apan kon modaog ang Tropang 5G, hayan mahimong komplikado ang sitwasyon.
Ang Tropang 5G, nga mosagubang sab sa katapusan nilang tahas sa elimination round, naggunit og 6-4 nga rekord ug aduna pa’y buhing paglaom alang sa Top 4.
Gilauman nga ipagawas sa Hotshots ug Tropang 5G ang tanan nilang makaya gumikan sa grabe pagkamahinungdanon ang pag-angkon sa kadaugan ning sangkaa.
Hilabi na sa habig sa Tropang 5G, nga nagtinguha nga makalabni sa talagsaong Grandslam title.
Sa premirong duwa, magsangka ang Phoenix Super LPG Fuel Masters ug Blackwater Bossing, nga parehong apil sa teams nga wala na’y purohan nga makasulod sa quarter-finals.
Ang Fuel Masters, nga adunay 3-7 nga rekord, ug Bossing, nga adunay 2-8 nga rekord, parehong mosagubang sa katapusan nilang tahas sa elimination round sa dili pa sila hingpit nga manamilit sa komperensya. / ESL