Top 4 tuyo sa Beermen

Top 4 tuyo sa Beermen
Basketball (File Photo)

Mga duwa karon:

4:00 pm- San Miguel batok Blackwater

8:00 pm- Meralco batok Terrafirma

Seguradong luna sa top four ang tinguha sa San Miguel Beermen sa ilang pagpakigbatok sa Blackwater Bossing sa premirong duwa ning Biyernes, Enero 12, 2024, alas 4:00 sa hapon, sa Philippine Basketball Association (PBA) Season 48 Commissioner’s Cup sa Araneta Coliseum.

Ang Beermen, nga mosagubang sa katapusan nilang tahas sa elimination round, adunay 7-3 nga rekord diin natanggong sila sa three-way tie sa ikatulong luna kauban ang Meralco Bolts ug Brgy. Ginebra Gin Kings.

Hinuon, deretso mapaslak ang Beermen sa top four kon modaog sila ning sangkaa gumikan kay segurado man silang modaog sa quotient kon adunay magtabla alang sa inilugay sa nahabiling duha ka mga luna sa top four.

Kon mapilde ang Beermen, delikado pa sila nga dili makasulod sa top four.

Apan gituohang kuli kining mahitabo hilabi na kay mobalik na pagduwa sa Beermen ang ilang Sugboanong higante nga si June Mar Fajardo, kinsa taodtaod sab nga wala nakaduwa kay nagpaalim kini sa angol sa iyang wa nga kamot.

Sa ilang bahin, ang Bossing nagbitay sa ilawom nga bahin dala ang 1-9 nga rekord ug usa sa teams nga wala na’y purohan nga makaabante.

Labing seguro, buhaton sa Bossing nga makamugna og surpresang kadaugan aron makabawon og gamay nga garbo sa ilang pagpanamilit.

Sa main game, magsangka ang Bolts ug Terrafirma Dyip sugod sa alas 8:00 sa gabii.

Kinahanglang modaog ang Bolts ning sangkaa aron magpabilin buhi ang ilang paglaom sa inilugay og puwesto sa top four.

Mahinungdan ang pagsulod sa top four kay nagtangag kini og twice-to-beat alang sa nagkaduol nga quarter-finals.

Sa ilang bahin, ang Dyip naa sa may ilawom nga puwesto dala ang 2-8 nga rekord ug sama sa Bossing, wala na sab kini purohan nga makaabante.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph