Hugot ang pagtuo ni Atty. Ferdinand Topacio nga dili mahinayon ang disqualification case nga gipasaka batok ni Cebu Governor-elect Pam Baricuatro.
Kini bisan paman sa kabalaka sa kampo ni Baricuatro nga hangtod ning pagsuwat, wala sila makadawat og summon o mga pahibalo gikan sa Comelec kalabot sa pag-irog sa maong kaso.
"That disqualification case is bound to fail...," matod ni Topacio sa Hunyo 28, 2025.
Kahinumduman nga nanukad ang maong kaso dihang gipasanginlan si Baricuatro sa mga iregularidad nga naglambigit sa usa ka dili awtorisado nga survey sa eleksyon nga mahimong nakaimpluwensya sa mga resulta.
Matod sa reklamo, ang maong survey giingong gipakatap nga walay saktong clearance ug posibleng nakalapas sa mga balaod sa eleksyon nga may kalabutan sa premature campaigning o pagmaniobra sa opinyon sa publiko.
Nanghinaot si Topacio sa mas taas nga probability nga mabasura ang maong kaso batok ni Baricuatro subay sa tulo ka mga rason.
Una niini ang sayop nga pagduso sa complaint sa Comelec 7 Regional Director diin ang susamang petisyon kinahanglan nga iduso sa Clerk of the Commission o sa Law department sa komisyon ug di sa regional office.
Ikaduha, wa matino kon kinsa ang nag-publish sa naasoyng survey.
"Sino ang nag-publish? Hindi po maiuugnay, they cannot connect that Facebook page to Governor Pam kasi po may doctrina po sa law called res inter alios acta, the acts of the third person cannot affect you otherwise napakasimple nalang magpa-disqualify?" matod ni Topacio.
Ikatulo ang pag-publish sa usa ka survey wa nahilakip sa grounds alang sa disqualification.
Gipasabot ni Topacio nga kini usa ka criminal case nga mahimo nga makamulta o makapyansa apan di basehanan alang sa pag-disqualify sa usa ka kandidato.
Subay niini, nanawagan si Topacio sa mga Sugbuanon nga ipakita sa Comelec nga di kini mouyon ug motugot nga ma-disqualify ang umaabot nga gobernador.
"Hindi po level ang playing field, dapat po ipakita natin sa Comelec na we will not allow seven people to substitute the decision for the decision of the one million people in Cebu province... The consequences should be severe if the Comelec now dominated by appointees of President Marcos Jr. ay ita-thwart nanaman nila. Dapat malaman nila na dito sa Cebu Province we will not allow such a travesty to the people's will." / ANV