Nakasugat og dili maayong tilimad-on ang Indiana Pacers sa labing una nilang pagbiyahe pabalik sa National Basketball Association (NBA) Finals sulod sa 25 ka tuig.
Sa usa ka charter flight kagahapon, Miyerkules, Hunyo 4, 2025 (PH time), ang Pacers nagpaingon na sa Oklahoma City alang sa ilang pagpakigsangka sa OKC Thunder sa 2024-25 NBA Finals series nga sugdan karong Biyernes, Hunyo 6.
Apan nalangan ang pag-abot sa Pacers sa Oklahoma City gumikan kay atol sa ilang biyahe, adunay giisyu nga tornado warning, flood watch ug severe thunderstorm sa maong dapit.
Adunay usa ka tornado nga nasigpatan sa Norman, Oklahoma, mga 20 ka milya ang distansya gikan sa Oklahoma City.
Tungod niini, ang charter flight sa Pacers nitipas una sa Tulsa, Oklahoma diin gigasolinahan pagbalik ang abyon.
Gikan sa Tulsa, nibiyahe og balik ang Pacers ug naabot sila sa Oklahoma City nga ulahi og tulo ka oras ug tunga sa orihinal nga eskedyul.
Maayo na ang dagan sa panahon dihang naabot ang Pacers sa Oklahoma City mga alas 7:00 sa gabii (local time).
Taliwala sa ilang nasinati, wala natay-og ang kahinam sa Pacers sa pagpakigbatok sa host Thunder sa NBA Finals.
“You spend so much time thinking about getting there, but it’s like, you’re here now,” matod ni Pacers center Myles Turner nga napatik sa AP News.
“You didn’t really spend a lot of time thinking about, ‘OK, when I’m here, I’m going to do this, I’m going to do that.’ It’s like, ‘Let’s just get there.’ So now, that milestone has been achieved. It’s about doing something with the opportunity.”
Ang Pacers ug Thunder nakatakdang mag-abot sa NBA Finals Media Day karong Huwebes, Hunyo 5 (PH time), sa venue diin ipahigayon ang ilang best-of-seven series.
Mao kini ang labing unang pagsulod og balik sa Pacers sa NBA Finals gikan niadtong 2000 samtang labing una sab kini nga pagbalik sa Thunder gikan niadtong 2012. / Gikan sa wires