Nanawagan ang hepe sa Philippine National Police (PNP) nga si General Nicolas Torre III niadtong Huwebes, Agosto 14, 2025, sa publiko nga likayan ang paggamit sa Thuoc Lao nga sigarilyo, nga lokal nga nailhan isip “Tuklaw,” kay ang mga epekto niini mahimong mosangpot sa kamatayon sama sa ilegal nga druga.
Sa usa ka interbyu, si Torre niingon nga ang Tuklaw nga sigarilyo kabahin na karon sa ilang gipakusgan nga operasyon sa PNP batok sa ilegal nga druga.
Matod niya nga ang Police Drug Enforcement Group (PDEG) nakigkoordinar sa Philippine Drug Enforcement Agency (PDEA) ug sa Dangerous Drugs Board (DDB) aron masayran ang ilegal nga substansya nga anaa sa Tuklaw cigarettes.
“Well, inaalam natin ang origin ano, pero just like the other drugs currently in the market today na ating hinahabol at ating pinipigilan, may mga illicit trading routes na tinitingnan natin na maaaring pinagdadaanan ng mga substance na ito,” matod ni Torre.
“Walang mabuting idudulot sa inyo ‘yan at itong bottom line diyan, wala pa akong nakitang adik na maganda at guwapo. Lahat ng adik pangit. Hindi ba, tingnan niyo ang before and after. Artista, napakaganda, na-adik, tingnan mo ang itsura, di ba? Diretsong usapan, real talk. Wala pang adik or substance user na guwapo at maganda. Lahat pangit,” dugang niya.
Ang PDEA ug DDB sa sayo pa niingon nga ang Tuklaw adunay nicotine ug synthetic cannabinoid, nga mahimong mosangpot sa psychotic episodes ug hallucinations, nga nagsundog sa mga epekto sa marijuana apan mas kusgan ug delikado.
Sa ubay-ubay nga viral videos, ang mga indibidwal nga naggamit og Tuklaw, hilabi na sa rehiyon sa Bangsamoro, Palawan, ug Taguig City, nagpakita og mga seizure-like symptoms nga gihulagway sa mugbo ug pagkurogkurog nga paglihok sa lawas.
Sa Puerto Princesa City, Palawan, lima ka indibidwal, pulos estudyante nga nag-edad og 19 ngadto sa 25, ang gidakop atol sa buy-bust operation niadtong Agusto 11 tungod sa giingong kalambigitan sa pagdaghan sa Tuklaw.
Nakuha gikan sa mga dinakpan ang gidudahang dahon sa marijuana ug gidudahang synthetic cannabinoid.
Gikasuhan sila sa paglapas sa Republic Act 9165, o ang Comprehensive Dangerous Drugs Act of 2002.
Human sa paghimo sa confirmatory tests gamit ang Gas Chromatograph–Mass Spectrometry (GC-MS) sa mga Tuklaw cigarettes nga nasakmit atol niini nga operasyon, nakumpirma ang presensya sa synthetic cannabinoid.
Ang PDEA Laboratory Service nangayo og tabang sa internasyonal ug lokal nga forensic laboratories aron makatukod og klaro nga resulta.
Ang PDEA niingon nga ang Thuoc Lao usa ka tanom nga tabako nga gipatubo sa kabukiran sa Amihanang Vietnam. Sa lokal, kini mahimong sigarilyuhon o usapon isip bahin sa mga ritwal, apan ang tradisyonal nga paagi sa pagsigarilyo sa tabako mao ang paggamit og tubo nga gitawag og bamboo bong.
Ang nicotine content sa Thuoc Lao mahimong moabot og siyam ka porsiyento kon itandi sa ordinaryong sigarilyo, nga adunay average lang nga usa ngadto sa tulo ka porsiyento. / TPM / SunStar Philippines