MANILA – Giklaro sa Philippine National Police (PNP) ning Dominggo, Hunyo 22, 2025, nga ang ilang hepe, si Gen. Nicolas Torre III, wala nagtugot sa bisan kinsang fitness instructor nga mangulo sa usa ka weight loss program alang sa tibuok organisasyon.
Ang gitawag nga programa sa pagpamenos sa timbang, nga gipangulohan sa fitness vlogger nga si Rendon Labador, gipahigayon sa Camp Crame sa Quezon City niadtong Hunyo 19.
Sa usa ka memorandum nga giisyu niadtong Hunyo 21, ang hepe sa PNP Directorate for Police Community Relations nga si Maj. Gen. Roderick Augustus Alba nag-ingon nga ang kalihukan sa physical fitness gisugdan sa Police Community Affairs and Development Group (PCADG) ug naglakip lang sa ilang mga miyembro, dili sa tibuok PNP.
“In this regard, PNP personnel are directed to refrain from sharing misleading content. The Chief PNP has not authorized any fitness instructor to primarily lead a weight loss program for the entire PNP. Social media officers should exercise caution in posting and sharing content to avoid spreading misinformation that may cause confusion,” tipik sa memorandum.
Sa bag-o lang nga interbyu sa media, ang tigpamaba sa PNP nga si Brig. Gen. Jean Fajardo nag-ingon nga wala siya'y personal nga kasayuran bahin sa bisan unsang lakang aron kuhaon si Labador isip fitness coach, apan niingon siya nga bisan kinsa nga tawo dawaton nga motabang sa pagkab-ot sa sugo ni Torre nga ang tanang mga polis adunay himsog nga lawas.
Gipasidan-an nang daan ni Torre nga hatagan niya og graceful exits ang tanang opisyal sa pulisya nga dili makatuman sa iyang direktiba nga mahimong physically fit.
Si Labador niingon nga niuyon siya nga mangulo sa 93 ka adlaw nga physical fitness program sa PCADG nga walay bayad tungod kay polis usab ang iyang amahan. / PNA