Tourist van driver ga-sideline pagka pusher, nasikop

Nagtingkagol karon sa bilanggoan sa kapulisan sa lungsod sa Liloan, amihanan sa Sugbo ang usa ka drayber sa tourist van nga nag-sideline sa pagpamaligya og shabu human nasikop sa buy-bust, alas 2:40 sa hapon, Lunes, Agusto 19, 2024, sa Purok Cogon, Barangay San Vicente.

Ang suspek giila sa si Julius Antony, 30, ulitawo, ug taga Purok Tambis, Tambok-Lamac, Barangay Yati, Liloan.

Ang buy-bust gihimo sa mga sakop sa Municipal Drugs Enforcement Unit (MDEU) sa Liloan Municipal Police Station ubos sa kamandoan sa hepe nga si P/Maj. Charlie Santiago pinaagi sa koordinasyon sa Philippine Drug Enforcement Agency (PDEA) 7.

Matod pa nga ang suspek na-validate sa mga MDEU Liloan hinungdan nga gilusad ang buy-bust diin ang poiseur buyer nigamit og P500 nga buy-bust money aron pagpalit og usa ka gamay pakite sa shabu gikan niini.

Sa dihang nadakpan ang suspek, nakuhaan pa kini og laing tulo ka mga gagmay sa gidudahang shabu ug usa ka medium size diin ang tanan motimbang og P5.2 gramos ug may gibanabanang standard drug prize mga moabot og P35,360./DVG