Tourist van mibangga sa koral

Lain na usab nga aksidente ang nahitabo sa kurbadong dan sa national highway sa Sityo Suba, Barangay Pob­lacion, lungsod sa Argao, pasado alas 5 sa buntag, Dominggo, Hulyo 21, 2024.

Ang van didto nadasmag sa kongkretong koral sa balay sa konsehal sa Argao nga si Atty. Butchie Almirante.

Matod sa drayber nga si ‘Alvin’, 35, minyo ug taga Brgy. Curva, lungsod sa Medellin, gikan siya sa resort sa Maribago sa Siyudad sa Lapu-Lapu nga sakay ang duha ka Korean nationals nga babaye ug lalaki ug padung sila sa Brgy. Tan-awan, lungsod sa Oslob alang sa whale shark watching (butanding).

Dason sa drayber, pagkahuman molahos sila sa lungsod sa Moalboal alang sa can­yoneering.

Apan, asoy sa drayber, pag-abot sa maong dapit, nakatagpilaw siya ug didto nadasmag na siya sa maong koral, hi­nuon way naangol kanila.

Ang maong blind curve nailhan nga gumikan saka, daghan nang nadasmag nga sakyanan nga padung.

Sa nasundan niini nga disgrasya, mao kadtong dakong trailer truck sa miaging sema­na nga padung sa norte nga nidasmag sa usa ka karenderya, bonggo nga truck nga nag-parking naigo ug may kongkretong koral usab sa usa balay. / DVG