Tourist van nga giparada daplin sa dalan sa Barangay Tan-awan, Lungsod sa Oslob, Sugbo nikayo sayo sa buntag sa Martes, Pebrero 27, 2024.
Hinungdan nga naukay ang mga tawo sa maong lugar nga nakakita sa pagsilaob sa van.
Kini maoy nahipos nga kasayuran sa Superbalita Cebu sa dihang nahinabi ang laing drayber sa tourist van nga si Ben Sardido nga naghatod og mga turista sa maong dapit.
Gibutyag ni F01 Cristian Matoran, fire investigator sa Oslob, nga ang drayber sa nasunog nga van mao si Arnel Malang, 34 , minyo, taga Tunghaan, Minglanilla.
Sigun sa asoy ni Malang kanila nga human siya nipakanaug sa iyang mga pasahero nga mga South Korean tourist, iyang gipahiluna ang sakyanan daplin sa dalan nga nagpidpid sa sementado nga paril.
Apan wa siya nakabantay nga ang iyang gipuwestohan adunay daob.
Dali sab nga mirespondi ang kabumberohan apan grabe ang kadaot sa maong sakyanan nga gibana-bana nga moabot sa P700,000 ang danyos. / DVG