Patay nang nakaplagan sa iyang mga kauban sa alas 5:15 sa buntag sa Lunes, Abril 8, ang usa ka construction worker nga gituohan nga nahulog sa septic tank sa usa ka construction site sa P. Burgos St., Brgy. Centro, Siyudad sa Mandaue.
Gialarma ang Mandaue City Police Station 1 kalabot sa hitabo mga alas 8 na sa buntag.
Ang biktima giila nga si Vicente Benignos Bandolon, minyo, taga Asturias, tunga-tungang kasadpang Sugbo.
Base sa pasiunang imbestigasyon sa kapulisan sa Station 1 sa Mandaue City Police Office (MCPO) ubos sa kamanduan sa ilang hepe nga si P/Maj. Andy Michael S. Roque, nahibaw-an sa Superbalita nga mga alas 8:20 sa buntag, usa ka Arnel B. Sacaday nitaho kanila nga may nakit-an nga lawas sa gibuhat nga septic tank sa usa ka building.
Ilang nasayran nga mga ala 1 sa kaadlawon sa Abril 8, si Bandolon nag-inom og ilimnon nga makahubog samtang naglingkod sa bintana sa ikaduhang andana sa gitukod nga building.
Pagka alas 5:15 sa sayong buntag, siya nakit-an sa iyang mga kauban sa trabaho nga sila si John Paul Malinao ug Dominidor Pedrejo nga patay na su'd sa gihimo nga septic tank, katunga sa lawas naunlod sa tubig.
Dugang imbestigasyon ang himuon sa kapulisan sa pagtino kon nganong nahulog sa septic tank ang biktima ug kon wa bay foul play. / DVG