Gitugyan sa usa ka traffic enforcement officer sa Dakbayan sa Lapu-Lapu City ngadto ni Mayor Junard Chan ang nakit-an niyang P20,000 nga cash sa Barangay Poblacion Martes sa buntag, Mayo 20, 2025.
Si Mervin Durango Legarte nga sakop sa City Traffic Management System sukad sa 2019, nakakita sa kuwarta nga pulos tagsa ka libo nga papel nga gihiktan og lastiko alas 6:40 sa buntag sa merkado publiko.
Tungod kay way nakabutang nga ngalan sa tag-iya sa maong kuwarta, nakahukom si Legarte sa pagtugyan sa kuwarta ngadto sa mayor aron pagseguro nga mauli kini.
Ang 44-anyos nga enforcer nitug-an sa mga tigbalita nga bisan duna siyay igsuon nga naospital sa moabot sa iyang hunahuna nga taguon ang kuwarta.
Matod niya nga nasayod siya kon unsa kasakit ang mawagtangan og dakong kantidad sa salapi ug siya nagtuo nga ang tag-iya naguol pag-ayo.
“Happy kaayo na makatabang ta nila kung unsay mawala na gamit, gaan kaayo sa imong hunahuna nga makatabang ta nila,” matod ni Legarte.
Kini maoy ikatulong higayon nga si Legarte nitugyan sa nakit-an niyang mga butang nangawala.
Una kadtong P4,000 nga cash ug dunay importanteng mga dokumento ug ikaduha ang mobile phone nga gipanag-iya og doctor.
Matod ni Legarte nga kon dunay mo-claim sa kuwarta, ang closed-circuit television (CCTV) footage sa merkado mahimong ma-review pagsuta sa tinuod nga tag-iya.
Si Chan niingon nga ang iyang buhatan magpaabot sa tag-iya aron mokuha sa kuwarta. / DPC