Nakaangkon og angol sa iyang mga tudlo sa walang kamot ang usa ka traffic enforcer human maligsan sa usa ka puti nga SUV alas 8:30 sa buntag, Miyerkules, Hulyo 1, 2026 sa junction box sa Escario corner Osmeña Boulevard atubangan sa Provincial Capitol.
Ang biktima giila nga si Jovanie Verano, sakop sa Cebu City Transportation Office.
Sa kuha sa CCTV makita ang paghuot na sa mga sakyanan sa dalan Escario Corner Osmeña Boulevard atubangan sa Provincial Capitol. Aron dili mosamot ang buildup sa traffic sa dalan Escario gipahunong niya ang mga sakyanan nga gikan sa Banawa Guadalupe.
Samtang iyang gipahunong ang usa ka puti nga SUV mitalikod siya aron iyang sinyasan ang mga sakyanan nga naa sa Osmeña Boulevard nga mo go paingun sa Velez street.
Apan kalit lang siya nga gi dumbol sa puti nga SUV nga mi resulta sa iyang pagka tumba sa sementado nga karsada ug dayong ligid aron dili malatayan sa ligid sa sakyanan.
Bisan paman nga nakalikay ang iyang lawas ug ulo sa ligid nga maghatag unta niya dakong peligro naligsan gyud ang iyang walang kamot nga mi sangpot sa pagka samad niini.
Matod niya nga kung wala pa siya moligid dako ang posibilidad nga ma grabehan ang iyang angol.
“Awas man sa sakyanan ang Escario, so ako siya (SUV) nga gipahunong aron dili ma-block ang intersection. Nihunong man sad siya, so paghunong niya, ni-forward ko kay akong pahunongon ang ubang sakyanan. Niabante man og kalit, maayong pagkabunal nako,” matod ni Verano.
Tungod kay wala mohunong ang SUV, daling nanawag og backup si Verano pinaagi sa radyo ngadto sa iyang mga kaubang enforcer.
Usa ka parking boy nga giilang si Ariel Daan ang wala magduha-duha sa paggukod ug pagbabag sa maong sakyanan aron pahibaluon ang drayber sa nahitabo.
Matod ni Daan, ang iyang kaluoy sa enforcer mao ang naghatag kaniya og kaisog.
“Naluoy man ko sa traffic enforcer nga iyang naligsan, mao to ako gidagan ang driver. Gibabagan nako, unya dili man unta mohunong gyud. Ako gihan-an og labay og bato, mao to niabli siya sa pultahan, nagkurog,” asoy ni Daan.
Daling gidala si Verano sa usa ka pribadong tambalanan aron matambalan ang naangkon nga samad.
Sa iyang bahin, niangkon ang driver sa MU-X nga wala siya makabantay nga duna siyay naligsan. Sumala niya, gikan siya sa Lutopan sa Dakayan sa Toledo ug padulong unta sa Kapitolyo aron mag-asikaso sa titulo sa iyang yuta.
Hinuon, gipasalig sa drayber nga iyang abagahon ang tanang gastuhon sa pagpatambal sa enforcer.
Apan nidumili siya nga magpakuha og hulagway sa media.
Si CCTO Chief Raquel Arce nipadayag nga iyang gipangita karon si Daan aron personal nga makigkita niini ug hatagan og pasidungog. /