Hingpit nang ipatuman sa Cebu City Traffic Office (CCTO) ang “BanTal Discipline Zone” unya sa Lunes, Hunyo 23, 2025, nga nagtinguha sa pagsulbad sa grabeng kahuot sa trapiko subay sa Banilad-Talamban (BanTal) corridor.
Apan gisugat og pagsupak gikan sa mga drayber sa public utility jeepney (PUJ) kon epektibo ba kini aron maminusan ang kahuot sa trapiko sa maong dan.
Niadtong Hunyo 20, daghang mga drayber sa PUJ ang nitug-an sa SunStar Cebu nga nagduhaduha sila sa kaepektibo sa bag-ong pamaagi.
Nabalaka sila nga ang bag-ong mga rota hiktin ra kaayo ug makapasamot lang sa kasamtangan nga problema sa trapiko.
Matod nila nga ang pag-re-route sa mga sakyanan ngadto sa gagmay nga mga karsada sa kilid dili kalikayan nga mosangpot sa daghang bottleneck ug mas taas nga oras sa biyahe, imbes nga makapagaan sa kahuot.
“Dili ko mouyon. Traffic kaayo na diha kay gamay ang dalan pero wala mi mahimo kay ilaha mana pagbuot,” matod ni Natalio Y. Granzon Jr, usa ka tradisyonal nga drayber sa jeepney.
Samtang, si Roger Vallena, usa ka residente sa Barangay Bacayan, nipadayag sa iyang suporta alang sa bag-ong traffic scheme, nga nag-ingon nga kini usa ka maayong lakang tungod sa nagkadaghan nga gidaghanon sa mga sakyanan sa lugar ug ang kakulang sa pagpalapad sa dalan sa milabay nga mga tuig.
“It’s a very good one. Daghan kaayong mga sakyanan ang nangagi diha, high volume na ang traffic yet ang road wala ma-expand, it’s been years nya wala gyuy nahimo. Karon, at least they’re doing something,” matod niya.
Niadtong Hunyo 1, gihisgutan ni Mayor-elect Nestor Archival kini nga lakang aron mahupay ang nagpadayon nga kahuot sa trapiko subay sa Governor M. Cuenco Avenue, usa ka kritikal nga agianan alang sa mga motorista nga nagsapaw sa usa ka bahin sa Ban-Tal Road.
Si Cebu City Traffic Office Assistant Head Kent Francesco Jongoy nibutyag nga dunay upat ka pamaagi sa “discipline zone.”
Una, pagtukod sa Talamban Circle: Kini nagtumong sa pag-una ug pagdumala sa taas nga gidaghanon sa trapiko atol sa oras sa kabuntagon ug hapon.
Ikaduha, paghimo sa PUV Lay-bys: Kining mga gitudlo nga hunonganan sa gawas sa dalan alang sa mga jeepney ug bus gituyo aron maghatag og mas luwas ug mas sayon nga kasakyan ug hunonganan sa mga pasahero.
Ikatulo ang pagbutang og Motorcycle Lane: Ang kinatumyan nga lane sa matag agianan sa Governor Cuenco Avenue itudlo isip motorcycle lane, susama sa pagpahimutang sa Cebu South Coastal Road (SRP).
Ang ikaupat, pagbalhin sa mga PUJ ngadto sa Highway 77: Ang mga Public Utility Jeepney (PUJ) paingon sa Tintay i-re-route ngadto sa Highway 77 aron maibanan ang gidaghanon sa trapik sa sakyanan subay sa Talamban gym hangtod sa Tintay.
Sa report sa Sunstar niadtong Hunyo 1, gipatin-aw ni CCTO head Racquel Arce nga atol sa rush hour (alas 4 sa hapon hangtod alas 8 sa gabii), ang mga Tintay-bound PUJ kinahanglang moliko sa tuo sa Highway 77 gikan sa Talamban Road, moagi sa Talamban Gym junction ug mogawas duol sa barangay hall sa dili pa moadto sa Tintay.
Gipahibawo usab ni Jongoy nga adunay mga silot alang sa mga kalapasan ubos sa traffic code.
Iyang gitataw nga ang mando sa CCTO para lamang sa traffic management, di sa mga long-term infrastructure project.
Iyang giila ang panginahanglan alang sa gipalapdan nga pagpatuman sa trapik, nga nagdapit sa mga estudyante sa criminology sa nagkalainlaing unibersidad aron motabang, isip praktikal nga oportunidad sa pagbansay kanila.
Nagplano ang CCTO og information drive pinaagi sa social media ug mga traffic advisory sa mga strategic locations ug ang pagpakatap sa impormasyon sa mga stakeholder nagsugod na niining semanaha. / Antonette Caren Arrabis, CNU Intern ug Jeanette Arinque, HNY Intern