Gikahimamat og balik ni Filipino boxing legend Manny Pacquiao ang dugay na niyang American trainer nga si Freddie Roach ning Martes, Mayo 20, 2025, sa Wild Card Gym sa Los Angeles, USA.
Mao kini ang opisyal nga pagsugod sa training camp ni Pacquiao alang sa iyang pagbalik og away gikan sa dul-an sa upat ka mga tuig nga pagretiro.
Ang Pambansang Kamao ng Pilipinas nakatakdang mosaka pagbalik sa ring karong Hulyo aron suwayan pag-ilog ang korona ni World Boxing Council (WBC) welterweight champion American Mario Barrios.
Wala pa man tuod kontrata nga napirmahan apan ang tanang mga dalan nagpaingon na sa katumanan sa panagharong nila ni Pacquiao ug Barrios.
Sama sa naandan, kauban ni Pacquiao sa iyang training camp ang karaan niyang Filipino trainer nga si Buboy Fernandez.
“This is the beginning of a new chapter. I’m motivated, I’m inspired, and I’m ready to show the world that I still have what it takes,” pamahayag ni Pacquiao nga naghatag og senyales nga opisyal na ang iyang pagbalik og away.
“Laban ito para sa bayan. Para sa lahat ng naniniwala na hindi pa tapos ang laban,” dugang ni Pacquiao, kinsa adunay 62-8-2, 39KOs nga rekord.
Si Pacquiao, kinsa nag-edad na og 46, maoy bugtong 8-division world champion sa kasaysayan sa boksing. / ESL