NAANGOL ang usa ka 42-anyos nga pahinante human nalimbuwad ang gisakyan nila nga trak pasado alas 10:00 sa gabii,Hunyo 17,sa Sityo Banker, Barangay Tapon, Lungsod sa Dalaguete.
Ang nakaangkon og samad sa iyang ulo mao si Jason Lonzega,minyo ug residente sa Barangay Langtad, Argao.
Samtang ang drayber sa maong trak nailhan nga si Jovito Lanorias,52-anyos,minyo nga silingan ra sa maong pahinante.
Sa gihimong imbestigasyon sa kapulisan sa Dalaguete nga gikan ang trak sa lungsod sa Dalaguete paingon unta sa Lungsod sa Argao apan pag-abot sa nahitabuang lugar, nawad-an og kontrol ang sakyanan nga adunay karga nga dako nga generator.
Kurbadahon ang maong dapit ug wa na makakupot ang brake hinungdan nga nabangga kini sa daplin nga bahin sa karsada nga miresulta sa pagkalimbuwad.
Nakaangkon og grabi nga samad sa ulo ang pahinante nga padayon pa nga nagpaalim sa tambalanan samtang ang drayber anaa ra sa luwas nga kahimtang. / JDG