Trak mibangga sa poste, drayber patay
Patay ang drayber sa 14 wheelers truck nga nabangga sa usa ka poste sa national highway sa Barangay Poblacion, lungsod sa Barili, habagatan sa Sugbo, alas 11:10 sa buntag, Biyernes, Septiyembre 27, 2024.
Ang biktima nga nagmaneho sa Isuzu 14-wheeler truck mao si Rowel Merasol, hamtong ang panuigon, minyo, ug taga Barangay Ocaña, dakbayan sa Carcar.
Sa imbestigasyon sa kapulisan sa Barili ubos sa deriktiba sa ilang hepe nga si P/Capt. Gerald Casalme nasuta nga trak de karga puno sa construction materials nga nag biyahe gikan sa Carcar ug nagpadulong sa lungsod sa Dumanjug.
Apan pag-abot sa nasoy nga dapit, gikataho nga nawad-an o dili na mogana ang preno hinungdan nga wala na'y kontrol ang drayber sa sakyanan ug nibangga sa usa ka poste sa daplin sa dan.
Sumala sa kapulisan, sa kakusog sa impact, ang biktima nakaangkon og grabeng kadaot sa iyang lawas nga niresulta sa kamatayon niini. / DVG, Tampo nga hulagway