Trak nahaybol; 1 patay, 6 naangol

NAHAYBOL: Gihulbot sa mga rescue personnel ang drayber ug sakay niini (tuo) human nahaybol kining Bongo Elf truck sa alas 12:57 sa udto sa Dominggo, Mayo 5, 2024 sa Sityo Tamburong, Brgy. Anajao, bukiran sa lungsod sa Argao, habagatang Sugbo. Usa ka pasahero namatay (ubos).  /
NAHAYBOL: Gihulbot sa mga rescue personnel ang drayber ug sakay niini (tuo) human nahaybol kining Bongo Elf truck sa alas 12:57 sa udto sa Dominggo, Mayo 5, 2024 sa Sityo Tamburong, Brgy. Anajao, bukiran sa lungsod sa Argao, habagatang Sugbo. Usa ka pasahero namatay (ubos). / DARIO V. GIL

Usa ang patay ug unom ang nangaangol sa lain na sab nga aksidente sa sakyanan sa Sugbo.

Usa ka Isuzu Elf cargo truck nawad-an og brake ug nahaybol samtang nagdulhog sa Sityo Tamburong, Brgy. Anajao, bukiran sa Argao, habagatang Sugbo sa ala 1:20 sa hapon, Mayo 5, 2024.

Lakip sa unom nga nangaangol mga langyaw nga nag-angkasay sa usa ka motorsiklo.

Sa interview sa Superbalita Cebu kang Anajao Brgy. Captain Geralden Albero sa Dominggo sa hapon, iyang nasayran nga gikan ang mga biktima sa lungsod sa Dumanjug nga may karga nga mga sinakong kopras.

Ila na kini nga naandan nga itumod sa Mompeller, Argao.

Apan sa pagtadlas sa dulhogon nga bahin sa Tamburong, nawad-an sa brake ang sakyanan. Usa sa mga pasahero nga lalaki nalabay gikan sa trak ug sa kakusog sa impact sa pagtugpa, namatay.

Nakaigo usab og duha ka mga motorsiklo ang trak, usa niini mao ang gisakyan sa duha ka mga langyaw. Naapil sila og kahulog sa pito ka tiil nga kimba sa kilid sa dan.

Sa follow up sa Superbalita Cebu sa kapulisan sa Argao MPS, nasuta sa imbistigasyon ubos sa kamanduan sa ilang hepe nga si P/Maj. Ivy Martin Bartolome, nailhan ang namatay nga si Lorenzo Sardañas, 47, minyo, taga Sityo Tiguib, Brgy. Langin, Ronda.

Ang ubang mga nangaangol naglakip sa drayber nga si Anabel Saromines Seguival, 51, minyo, taga Tiguib, Langin, Ronda; ug mga sakay nga sila si Alhambra Blanco Seguival, hamtong; Gregorio Sardañas Seguival, minyo; ug Lene Sardañas, minyo.

Mga disaster responder gikan sa Argao ug Ronda maoy ningtubag sa emerhensya.

Niadtong Sabado, duha ang nangamatay ug 21 ang nangaangol human nabalitok ang usa ka van for hire sa Cebu-Cordova Link Expressway (CCLEX). / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph