Dili mominos 15 ang nangamatay ug duha ang nangaangol sa pagkahagbong sa usa ka trak de karga sa pangpang sa national highway sa Barangay Bulwang, lungsod sa Mabinay, Negros Oriental, ala 1:46 sa hapon sa Miyerkules, Pebrero 21, 2024.
Sa pasiunang kasayuran nga nakuha sa Supebalita Cebu gikan sa tigpamaba sa Negros Oriental Police Provincial Office (NOPPO) nga si Police Lt. Stephen Apolinar, ang mga biktima sakay sa Mitsubishi Canter nga trak nga gimaniho sa drayber nga si Antonio Toreno, biyudo, gikan sa La Libertad, paingon sa Brgy. Dawis, Bayawan City.
Matod ni Apolinar, nawad-an og kontrol ang drayber sa sakyanan hinungdan nga nalahos ang trak ngadto sa pangpang.
Ang mga nangakalas pulos usab nga taga La Libertad giila nga sila si Ireneo Magos, 37, minyo; Fe Decipolo; Rolindo Decipolo Sr.,63, minyo; Jemboy Egoogan; Rolindo Decipolo, Jr., 29, minyo; Marlon Solidad, 46, minyo; Rex Decipolo, 33, minyo; Rene Magos, 46, minyo; Allan Flores, 36, minyo; Allen Pocong, 44, minyo; Remond Llenes, 29, minyo; Roy Magos, 29, minyo; Leo Soreño, 43, minyo; Jacob Labrador, 28, minyo; ug Almar Egoogan, 26, single.
Nangaangol giila nga sila si Toreno ug Jovanni Flores, minyo. Ang mga biktima gipangdala sa Mabinay Community Hospital apan ang uban kanila nakabsan na sa kinabuhi sa pag-abot sa tambalanan.