Duha ka high value individual ang nadakpan sa buy-bust sa mga sakop sa City Drug Enforcement Unit (CDEU) sa Cebu City Police Office (CCPO) alas 12:20 sa kaadlawon, Sabado, Hulyo 12, 2025 sa sulod sa Doña Pepang Cemetery, Barangay Tejero sa Dakbayan sa Sugbo.
Ang mga dinakpan giila nga silang Edwin Bellingan Tariga ug naila usab sa maong dapit nga si alyas Edgar, 54, residente sa Sitio Lawis, Barangay Tejero nga maoy target sa operation ug ang iyang batabata nga maoy iyang suguon nga si Paul Orillo Sy, alyas Puldo, habalhabal driver nga taga Sitio Rio, Barangay Lahug.
Nasakmit sa mga personnel sa CDEU ang mga dagkong putos sa gituohang shabu nga motimbang og 530 gramos nga dunay standard drug price nga P3,604,000.
Matod ni Police Major Efren Diaz ang hepe sa CDEU nga si Tariga ang ilang target human nigawas ang pangalan niini sa mga unang nadakpan nga maoy tinubdan sa supply sa ilegal nga drugas.
Samtang si Puldo ang tighatod sa supply sa illegal drugs sa ilang customer.
Usa ka buwan nila nga gipaubos sa monitoring ang maong mga suspek ug sa dihang nakuha na ang tanang impormasyon gipahigayon dayon ang buy-bust nga niresulta sa ilang pagkasikop.
Giingong makabaligya si Tariga og 500 gramos nga shabu matag semana ug ang iyang area mao ang Siyudad sa Sugbo ug Lapu-Lapu.
Ang mga nakuhang ebidensya giduso na sa PNP Forensic Unit alang sa himuon nga chemical analysis.
Kalapasan sa Section 5 ug 11, Article II, Republic Act 9165 ang giandam nga kaso sa CCPO batok sa mga suspek. / AYB