Nagsugod na og hikay ang kampo ni Governor-elect Pamela Baricuatro alang sa hapsay nga transition pinaagi sa pakig-alayon sa Department of Interior and Local Government (DILG) Cebu Province sa Mayo 19, 2025.
Si Baricuatro gikatakda nga mohulip na sa posisyon sa Hunyo 30, 2025.
Subay sa suwat nga gipadala sa transition team sa bag-ong gobernador sa Mayo 19, nangayo kini og abag gikan ni DILG 7 Provincial Director Robel Sastrillo subay sa Memorandum Circular 2025-016 nga naglatid sa mandato sa DILG sa pagseguro sa tunhay nga pag-turnover sa mga responsibilidad sa bag-ong mamuno.
Pormal usab nga gipailaila sa kampo ni Baricuatro ang transition team niini nga gipangulohan ni Atty. Edmund Lao, Paulo Uy alang sa IT and Digital, ug Ruben Licera alang sa Media, Information and Tourism.
Samtang miyembro niini sila si Aldwin Empaces sa Administration, Atty. Rubie Virtucio alang sa Legal and Legislation, Titing Esgana sa Budget and Audit, ug Ferliza Contratista alang sa Human Resource and Communications.
Pinaagi sa pormal nga pamahayag nga giluwatan ni Baricuatro, ang mga miyembro sa transition team gipili mismo niya subay sa ilang kasinatian ug giingong dili tungod sa politika, kon dili tungod sa ilang katakus nga motabang pagtukod og bag-ong Sugbo.
Gipasabot ni Lao nga kini gituyo aron pagseguro nga walay kakulian ang padayong paghatag og serbisyo sa publiko taliwa sa bag-ong mangulo.
Lakip sa transition process ang nag ung-ong usab nga kabalaka sa mga empleyado ubos sa kasamtangang administrasyon sa ilang pagpanrabaho nga gipahibawo ni Lao nga adunay himuon nga formal evaluation aron maseguro nga magpabilin ang mga takus nga mopadayon sa ilang serbisyo sa probinsiya.
“Part sa mandate of the transition committees to recommend policies on human resources including sa atong employees so si Gov. Pam is after the welfare nila and committed siya nga mo-follow sa rules of employment so iyang i-review...We will make sure that all processes will be followed and there will be an evaluation,” matod ni Lao. / ANV