GIISIP nga labing dakong hagit nga giatubang sa Mandaue City Police Office (MCPO) ang problema sa traffic aron makab-ot ang 3-ngadto-5-minuto nga tagal sa pagtubag sa emerhensya sa Philippine National Police (PNP).
Bisan pa niini, gipasalig sa MCPO nga ang ilang mga sakop dunay katakos sa pagtubag sa saktong oras.
Kini gipakita atol sa usa ka simulation exercise nga gihimo niadtong Martes sa udto sa Angelecum Garden of Angels sa Barangay Canduman diin ang MCPO response team niabot sa lugar sulod lang sa 4 ka minutos ug 21 segundos human nadawat ang dispatch order eksaktong alas 12:00 sa udto.
Ang maong drill nahiuyon sa direktiba ni PNP Chief General Nicolas Torre III, ug gibantayan ni MCPO City Director Police Colonel Cirilo B. Acosta Jr.
Bisan pa sa kalampusan sa simulation, namatikdan sa kapulisan nga ang huot nga trapiko ilabi na sa mga sudlunon nga dalan, nagpabilin nga problema sa pagtubag sa emerhensya.
Matod sa MCPO nga padayon silang makig-alayon sa mga traffic enforcer ug mga yunit sa barangay aron mas maminusan pa ang oras sa pagtubag ug mapadayon ang kaandam pagtubag sa mga emerhensya. / CAV / Zenn Dee Tejero, CNU Intern