Kaso nga Acts of Lasciviousness ang gisang-at batok sa traysikol drayber human nga matod pa mikumot sa dughan sa iyang pasahero niadtong Dominggo sa gabii, Agusto 25, 2024 sa Barangay Candaguit, Lungsod sa Sibonga, Cebu.
Samtang niadtong Agusto 27, hingpit nga nasang-at ang kaso batok sa suspek nga si alyas Orland, taga Barangay Abugon, Sibonga.
Base sa inisyal nga kasayuran nahipos sa Women and Children Protection Desk sa Sibonga Police Station nga ang 20 anyos nga biktima sakay sa traysikol ni Orland uban sa laing duha ka mga pasahero.
Ang ubang mga pasahero ang unang mikanaog pag-abot sa ilang destinasyon samtang ang biktima mao nalay nahibilin nga pasahero niadtong tungora.
Nakamatikod ang biktima nga miliko ang drayber nga wa na mosubay sa rota kay matod pa adunay siyay butang nga gipangita.
Nabalaka ang dalaga sa dihang naabot sila sa ngitngit nga dapit nga layo na sa highway.
Giparada sa suspek ang iyang unit sa awa-aw nga lugar kay kuno adunay gisubay nga butang nga nawala.
Apan nakurat nalang ang biktima sa dihang gigakos siya sa maong drayber ug gihinol ang pribadong bahin sa iyang lawas, nakahigayon og dagan ang dalaga ug nangayo og pakitabang sa residente sa maong dapit.
Nasikop ra sab gilayong ang suspek sa mga polis inabagan sa mga barangay tanod.
Matod ni Police Staff Sgt. Maricor Mabale, assistant WCPD miingon nitukar ang biga sa suspek dihang sila nalang sa iyang pasahero.
Una nanghimakak ang suspek, apan sa nagpadayon sa imbestigasyon mi-angkon na kini sa iyang nahimong sayop. / GPL