Usa ka traysikol drayber ang naangol human gipusil ra sab sa iyang silingan sa Barangay Lamacan, Argao, Sugbo, mga alas 11 sa buntag, niadtong Biyernes, Agusto 9.
Ang 34 anyos nga biktima giila nga si Rolito, nakaangkon og samad pinusilan sa iyang tiyan.
Samtang ang suspek giila nga si alyas Walter, hamtong.
Sa imbestigasyon sa Argao Police Station nasayran nga gihulga ni Rolito ang gihinganlan og Joy, live-in partner sa igsuon sa suspek, nga nagsakay niadtong higayona sa motorsiklo.
“Padaplin mo diha, dagitan tika ron,” singgit ni Rolito samtang miagi sa balay ni Walter.
Taudtaod, nibalik si Rolito ug nisinggit sa gawas sa balay nga nagwarawara og screwdriver.
Ang biktima giingnan sa igsuon sa suspek nga maghilom.
Mibiya ang biktima apan wa magdugay mibalik nga may dalang sanggot ug matod pa mihagit sa suspek.
Sa dihang nigawas sa balay ang suspek way pagduhaduha gipusil ang biktima.
Si Rolito daling gidala sa Isidro C. Kintanar Memorial Hospital sa Barangay Bogo, Argao, samtang si Walter dali nga miikyas human sa hitabo ug gipangita karon sa kapulisan sa Argao nga pinangulohan ni Major Janus Giangan. / DVG