Traysikol nahulog sa pangpang; 1 namatay
■ NAHULOG: Mao kini ang bahin sa Manipis Road sa habig sa Brgy. Kampo 4, Dakbayan sa Talisay diin gituohan nga nahulog ang usa ka tangkaltangkal nga traysikol niadtong Huwebes sa gabii, Hunyo 20, samtang nagdulhog taliwa sa pagbunok sa uwan. Gikompirmar ni Jonathan Tumulak, hepe sa City of Talisay Traffic Operations and Development Authority (CT-TODA), nga magtiayon kauban ang ilang usa pa ka tuig kapin nga anak ang mga biktima. Estor­ya sa pahina 2. / CT-TODA

Traysikol nahulog sa pangpang; 1 namatay

Traysikol nahulog sa pangpang; 1 namatay
■ NAHULOG: Mao kini ang bahin sa Manipis Road sa habig sa Brgy. Kampo 4, Dakbayan sa Talisay diin gituohan nga nahulog ang usa ka tangkaltangkal nga traysikol niadtong Huwebes sa gabii, Hunyo 20, samtang nagdulhog taliwa sa pagbunok sa uwan. Gikompirmar ni Jonathan Tumulak, hepe sa City of Talisay Traffic Operations and Development Authority (CT-TODA), nga magtiayon kauban ang ilang usa pa ka tuig kapin nga anak ang mga biktima. Estor­ya sa pahina 2. / CT-TODA

Usa ang patay ug duha ang nangasamdan, usa kanila kritikal human nahulog ang traysikol nga tangkaltangkal nga ilang gisakyan sa pangpang sa Manipis Road sa Kampo 4, Dakbayan sa Talisay.

Gituohan nga niana pang gabii sa Huwebes, Hunyo 20, 2024, taliwa sa pagbunok sa uwan kini nahitabo apan sa Biyernes na nakit-an sa usa ka lalaki nga mangubkobay og bas sa Mananga River.

Gituohan nga ang mga biktima magtiayon kauban ang ilang gibana-banang usa ka tuig kapin pang anak nga lalaki.

Matod ni Jonathan Tumulak, pangu sa City of Talisay Traffic Operations and Development Authority (CT-TODA), nga ang mga tawo sa dapit nisulti kanila nga kanunay nila makit-an ang mga biktima nga sakay sa traysikol.

“Mao na nga gatuo mi nga magtiayon kay daghan ang nakakita ani nila nga pirme moagi sa lugar magsakay anang tangkaltangkal.”

Tuod man, gabii sa Biyernes, si Tumulak nikompirmar sa Super­balita Cebu nga magtiayon ang mga biktima kauban ang ilang usa ka tuig kapin pa nga anak nga lalaki human giila sa kabanay nila nga niadto sa ospital.

Si Josephine Sabal niila sa iyang igsuon nga si Jerome Sabal ingon man sa asawa niini nga si Marilyn Mimis Sabal ug ilang anak nga si Japher, usa ka tuig kapin pa, taga Purok 8, Carmen, Dakbayan sa Toledo.

Matod ni Tumulak nga gikuha sa iyaan ang iyang pag-umangkon gikan sa personnel sa Dept. of Social Welfare and Services (DSWS) sa Dakbayan sa Talisay.

Ang magtiayon nagnegusyo og scrap ug mga prutas.

Base sa pasiunang imbestigasyon ni P/Master Sgt. Reynaldo S. Tañica, investigator on case (IOC) sa Talisay City Traffic ubos sa kamanduan sa ilang hepe nga si P/Lt. Col. Epream Paguyod, unang nadiskobrehan si Jerome sa daplin sa sapa sa usa ka mangubkobay og bas.

Sa unahan, nakit-an ang tricycle nga tangkaltangkal nga nabalintuwad na.

Sa ilang paghangad sa ibabaw, didto nakit-an si Marilyn nga nasangit sa mga kahoy kahoy ug nasuta nga patay na.

Dayon nakadungog sila og kusog nga hilak sa usa ka bata nga nakaplagan sulod sa tangkal nga dunay mga samad.

Unang nailhan si Jerome, 39, nga dunay address nga Barangay Quiot, Siyudad sa Sugbo gumikan sa duha ka mga identification (ID) card niini samtang sila si Marilyn ug anak wa pa mailhi.

Si Jerome nga kritikal tungod sa samad sa ulo gidala sa Cebu South Medical Center sa Dakbayan sa Talisay.

Apil nga gidala ang ilang anak nga giatiman dayon sa DSWS human napahibawo nila ni Tumulak. Ang lawas ni Marilyn gidala sa punerarya. / REV

SunStar Publishing Inc.
www.sunstar.com.ph