Wa makabantay ang 62 anyos nga drayber sa traysikol nga nagmaneho sa iyang unit nga dunay tapok sa graba sa daplin sa national highway sa Barangay Tulic, Lungsod sa Argao, alas 8:45 sa gabii, Martes, Septiyembre 10, 2024.
Nadusmo sa tapok sa graba ang traysikol nga gimaneho ni Eduardo Landongan, taga Barangay Binlod, Argao, hinungdan nga misarasay ang dinaganan sa traysikol hangtod nga nalimbuwad.
Atol sa maong hitabo nalabay si Landongan apan naligsan sa nagsunod nga bus.
Gitabang ang drayber traysikol ug gidala sa Isidro C. Kintanar Memorial Hospital (ICKMH) sa Barangay Bogo, Argao apan gideklarar sa attending physician nga patay na.
Nasayran nga way laing sakay sa maong motorsiklo ug ang drayber mopaingon unta sa ICKMH kay moduaw sa iyang anak nga anaa sa ospital.
Ang drayber sa bus gitanggong sa kapulisan samtang nagpaabot sa reklamo o pagpasaka og kaso sa pamilya sa biktima. / DVG