Hingpit nga nidominar si Joperson Trazo sa iyang pagposte og unanimous decision nga daog batok ni Marlon Alejandro aron angkunon ang Philippine Boxing Federation (PBF) minimumweight belt sa main event “Fists of Fury 5: Sumbagay sa Talisay” boxing promotion niadtong Martes sa gabii, Pebrero 18, 2025, sa Brgy. Lagtang Gym sa Lagtang, Talisay City.
Si Trazo, kinsa usa sa sumosulbong nga mga boksidor sa Chao Sy stable, nitumba ni Alejandro sa 3rd round pinaagi sa body shot.
Giusban pagtumba ni Trazo sa 6th round si Alejandro pinaagi sa right uppercut.
Taliwala sa grabeng bun-og nga iyang nadawat, nakalahutay gihapon si Alejandro paghuman sa away.
Ang dominasyon ni Trazo dayag sa scorecardss sa tulo ka judges, 80-70, 80-70, ug 78-72.
Ang stablemates ni Trazo nga sila si Jefre Jimenez (4-0, 2 KOs) ug Vicente Unidos (3-0, 2 KOs) ningdaog sab sa promosyon.
Gipaundang ni Jimenez sa 2nd round si Cerwin Genosas (2-4, 2 KOs) samtang nitali sab og 2nd round TKO nga daog si Unidos batok ni Venjie Patac (2-11-1, 1 KO).
Sa lain pa nga away, niposte og unanimous decision nga daog si Dave Peñalosa (18-1, 12 KOs) batok ni Vicente Casido (6-6-1, 2 Kos). / EKA, ESL