Sa pagsaulog sa Philippine Environment Month niadtong Hunyo, nipahigayon og tree planting activities ang Aboitiz Construction sa lima ka mga lokasyon sa Luzon, Visayas, ug Mindanao.
Kini nga kalihukan kabahin sa ikaduhang tuig sa ilang Safety, Health, Environment, and Security (Shes) Awareness Month.
Kapin sa 120 ka mga empleyado ang nananom og dul-an 1,000 ka seedlings sa Brgy. San Rafael sa Sto. Tomas City, Batangas sa pakig-uban sa AP Renewables Inc.; Brgy. Prenza sa Balamban, Cebu sa pakigkolaborasyon sa West Cebu Estate; Tarlac City pinaagi sa TARI Estate; Claver, Surigao del Norte; ug sa LIMA Estate, dayon sa Batangas.
Ang maong inisyatibo, nga gitawag og Project TERRA kon Tree Planting for Environmental Restoration and Renewal Action, usa ka paningkamot sa kompanya aron makatampo sa pagpanalipod sa kinaiyahan ug pagpangusog sa partisipasyon sa komunidad.
“These initiatives demonstrate how our Kauban team members continue to live out our core value of responsibility—not just in delivering quality projects, but also in caring for our communities and the environment,” matod ni Candee Ching, Senior Assistant Vice President for Business Transformation.
Gawas sa tumong nga makapananom, nagsilbi sab kini nga paagi sa pagpanaghiusa sa mga empleyado ug lokal nga stakeholders sa ilang mga lugar nga gitrabahuan.
Gikan pa kaniadto, aktibo na ang Aboitiz Construction sa mga kalihukan sa kalikupan.
Niadtong Pebrero, nitambong sab sila sa mangrove planting activity sa Brgy. Lumaniag, Lian, Batangas kauban ang Ramon Aboitiz Foundation, Inc. ug pinaagi sa partisipasyon sa mga mananagat ug sa Local Government Unit (LGU), natanom ang kapin sa 1,000 ka mangrove seedlings.
Kini nga mga buhat nagpamatuod nga gawas sa trabaho, aduna gihapon papel ang mga kompanya sa pagpanalipod ug pag-atiman sa atong kinaiyahan. / PR