Ang clutch three-pointer ni Phoenix Suns forward Kevin Durant sa nahabiling 18 segundos hingpit nga milubong sa Utah Jazz, 131-128, sa National Basketball Association (NBA) In-Season Tournament sa Sabado, Nobiyembre 18, 2023 (RP time) sa Salt Lake City, Utah.
Nipabuhagay og 38 puntos si Durant samtang ang guard nga si Devin Booker niamot og 24 puntos lakip na ang career-high 15 ka assists aron pangulohan ang Suns sa kadaugan sa korte sa Jazz.
Ang tres ni Durant maoy nakapalapad sa labaw sa Suns, 124-115, sa wa pa mo-rally ang Jazz aron ipaubos na lang ngadto sa one-point ang labaw sa Suns sa final minute sa duwa.
Apan didto ra kutob ang Jazz kay mibalos si Durant og cold-blooded nga tres 18 segundos sa fourth quarter nga maoy nakaminghoy sa Jazz ug nisilyo sa kadaugan sa Suns.
All-around game ang gibuhat ni Durant nga hapit maka triple-double sa iyang 38 puntos, giubanan sa siyam ka rebounds ug siyam ka assists.
Sulod sa 11 ka sunodsunod nga mga duwa nakahimo pagpupo si Durant og 25 puntos nga maoy longest streak sa active players karon sa NBA.
Mitabang sa Durant-Booker duo mao sila Jusuf Nurkic nga adunay 15 puntos ug Eric Gordon nga nitunol og 14 puntos.
Ang Jazz gipangulohan ni Filipino-American Jordan Clarkson nga mihimo og season-high 37 puntos. Nindot ang gipakita ni Clarkson karon nga season kay upat na ka sunodsunod nga mga duwa nga nakahimo siya og 26 puntos pataas, ang longest scoring streak sa iyang career. Si Lauri Markkanen adunay 21 puntos ug si John Collins nakatali og double-double nga 15 puntos ug 14 ka rebounds alang sa Jazz.
Wa pa makaduwa og dungan ang Big 3 sa Suns nga sila si Booker, Durant ug Bradley Beal sugod sa pagsugod karon nga season tungod kay i-reevaluate pa si Beal sulod sa tulo ka semana tungod sa lower back strain.