Nakaplagan nga dunay mga samad dinunggaban ang usa ka tricycle driver niadtong Miyerkules sa alas 7 sa gabii, Enero 3, daplin sa karsada sa Brgy. Bagay, Daanbantayan, amihanang Sugbo.
Nasuta nga dunay mga samad dinunggaban sa liog ug dughan si Jordan Cababan, 41, minyo, taga Brgy. Lawis, San Remigio, amihanang Sugbo.
Nasayran sa kapulisan sa lungsod sa Daanbantayan ubos sa kamanduan sa ilang hepe nga si Police Capt. Jan Christian Bautista nga ang biktima namasahero nga striker.
Nagpasabot nga way rota nga gisubay si Cababan, pakyaw pakyaw system.
May nakuha silang kasayuran nga may duha kini ka mga pasahero sa wala pa siya makaplagi.
Giila pa sa kapulisan ang duha ka mga pasahero ug di sab tulis ang motibo kay naa pa man ang kwarta, relo ug cellphone sa biktima.
Wa nila isalikway nga ang killers iya rang mga pasahero nga gikalalis labot sa pletihan, apan usa lang kini sa ilang gitan-aw nga posibilidad.